SARATOK: Tinda projek jalai Kupang Bajau ditu deka dikeluar ujung bulan Ogos tu enggau ungkus penyampau RM90 juta.

Sapit Menteri Pengeluar Kuasa enggau Pengeraja Asal, Ali Biju madah, agih belanja ungkup projek ngaga jalai Kupang Bajau nya udah dikemendar Perintah Besai.

Ku iya, projek nya deka berengkah dipejalai pengudah tembu ditinda nitihka perambu asal.

“Agih belanja RM90 juta dikemendar perintah dikena ngaga jalai ungkup pemansang infrastruktur ba kandang menua tu.

“Ukai semina nya aja, berita manah ke bukai baka projek nyeleti enggau ngaga baru Jalai ba sekeda menua laban agih belanja endang udah dikemendar nitihka peminta.

“Tu nyengkaum pengawa ngaga baru jalai alun ari Kaba ngagai Pagan enggau jalai Beting Maro ngagai Perpat deka digaga kandang taun 2021 ngagai 2025,” ku iya.

Ali mansutka jaku ba Program Randau Begulai Enggau Kaban Parlimen Saratok ba Rumah Panjai Abu Bengang sehari tu.