Britin RS prinsipal ti landik bemain kereban muzik

Beritin Empawi, 48 tauka Britin RS tepejuh ke dunya pemerindang bepun taun 1995 lebuh Pengerami ‘Fun fair’ ba Pulau Pinang, lalu maya nya keterubah iya merindang ba mua mayuh.

Kenyau ari nya iya selalu nyempulang pejalai penanyi tebilang Iban merindang ba selampur menua baka Clement Joys, Johny Aman, Angela Lata Jua, Florence Lo, Ricky EL, Ranny Pat, Maryline,Tony Engkabi, Dorsica Robert enggau ke bukai.

Taja chakah ba pengawa merindang, Britin kebendar ngembuan batang pengawa tetap iya nya nyadi Prinsipal SMK Ulu Layar bepun 2004 nyentuk diatu. Sebedau dichiri nyadi prinsipal di sekula tu iya kala gawa ba SMK BM Saratok enggau SMK Kalaka, Roban.

Kala mega nyereta band tebilang bukai baka Band Digital Sound (Sibu), Band Of Brother enggau The Revolution ari Saratok empu sereta pemadu baru iya nya Band RockSchool (Sibu) ti baru udah ngeluarka album single dikumbai ‘Nuan Ukai Ungkup Aku’ apin lama ke udah.

Entara bala bakih bukai begulai enggau Britin ngangkatka band RockSchool tu iya nya Lyister nyadi vocalist, Agah (keyboardist), Nemo (Drummer), Edward (2nd Guitar) enggau Britin empu (Lead Guitar).

BATANG PENGAWA…Pengajar Britin diangkat nyadi Prinsipal SMK Ulu Layar di Betong kenyau 2004.

Britin tau dikumbai siku ari orang veteran ba pengawa betebahka kereban muzik gitar, Britin tauka dikangau Pengajar Itin madah diri bedau tepantup ati seagi juluk ati apin tejapai iya nya deka meda abis nadai siku ari bansa kitai Iban ti landik bemain perengka muzik mujur diangkatka sebaka enggau pemuzik bansa bukai baka di Semenanjung.

JULUK ATI

“Kelimpah deka sama meda industri muzik kitai Dayak Iban seikas maju baka bansa bukai, aku mega deka meda bisi pemain perengka muzik lebih agi baka kereban gitar tu tebilang jemah.

“Entara pemain gitar dikerindu aku iya nya Slash, Kirk Hammet, Samad enggau Man Kidal kelimpah ari penebah gitar bansa kitai empu baka West, Will Masterpiece, Daniel Ading enggau Romy Majestica.

“Aku nemu tu ukai pengawa muntang, tang tetap pechaya juluk baka tu ulih dijapai nyema bisi sukung ari mensia mayuh tauka ejensi bekaul,”ku iya lebuh dirandau pemberita.

Asal ari Rumah Empawi, Bajau, Krian nyadi Britin mega ngembuan pelajar tikas Master Degree ari Universiti Sains Malaysia (USM) enggau Universiti Malaya (UM).

“Taja aku bisi batang pengawa ti meruan tang semua nya nadai pulaika penanggul tauka penekul ba aku sentang ngenatai ke diri maya bisi aktiviti merindang tauka peminta ari pengatur sebengkah pengerami,”ku iya.

MERINDANG…Britin (dua kanan) begulai enggau Band Rockschol maya merindang nyerumba Pengerami Borneo Dayak Cultural Festival Dayak 2019.

Britin anak ketiga ari enam diri menyadi chukup rinduka band ari menua luar baka Metallica, Guns & Roses,The Beatlles, Search enggau Wings lalu enda tinggal band Masterpiece enggau Majestica.

Kelimpah ari rentak bukai Britin ti chukup rinduka muzik genre balada enggau rock tu mega ngelalau nembiak rebak baru anang sanggu begiga betanya penemu enggau sebarang sapa enda ngira orang lama tauka baru.

“Anang malu betanya ba sapa-sapa laban penau enggau pengelandik siku-siku enda sama taja iya nya orang lama tauka baru ba dunya pemerindang.

“Pemadu beguna iya nya anang sumbung, ngembuan penemu lancham ngeninggi diri sereta iya ti pemadu manah iya nya seruran ‘stay humble’ (baruh ati).

“Ari nya baru kitai ulih beretan lama kelimpah ari orang bukai pan nyamai begulai berandau enggau kitai,”ku iya.

BRITIN RS

LALAU NUJU NEMBIAK SEKULA

Iya mega ngelalau nembiak sekuka ti bisi minat nyadi artis iya nya anang sesekali ninggalka pekara pelajar sekula diri laban nya beguna amat ungkup penerang pengidup dudi hari.

“Diatu kitai meda udah mayuh kitai bansa Iban ngembuan pelajar tinggi sereta mangku pengawa besai ba opis perintah,kompeni besai nyengkaum sida ti gawa ngati ke diri udah bulih pemujur ba dunya pemerindang.

“Tu mega meri pangka ti chukup manah ti ngasuh ati semampai berasai temegah laban bansa kitai udah tebuka runding nitih pemansang dunya,”ku iya baru.

Mulai pengingat keterubah iya merindang ba mua mayuh ba taun 1995 maya nyereta pekit Battle Of The Band ba Pulau Pinang.

“Maya tu aku agi belajar ba ngambi Degree ba Universiti Sains Malaysia (USM) ke mega terubah iya aku nebah gitar ba panggau besai sereta nerima penatai mayuh mensia.

“Maya nya aku apin bisi belanja dikena meli gitar nya alai aku nginjau gitar enggau kereban dikena bemain bukai baka pedal enggi bakih ti sama belajar enggau aku maya nya.

“Aku agi ingat bansa pedal gitar dikena aku bepekit maya nya suba iya nya pedal jenama Metal Zone lalu nya pan kengka iya kereban dikena tudah diri rambau pekit nya suba.

“Tu siti ari pengingat ti semampai dikeingat ke mega nyadika peransang aku nyentuk ke sehari tu dalam semua pekara. Pemujur penyamai endang bepun ari pemedis.

“Endang amat munyi jaku sempama mimit-mimit kelama nyadi bukit, diatu udah mujur bisi pengawa tetap aku ulih tebelika gitar enggau kereban bukai ti menyana agi ti sama baka ke dikena orang bukai mega,”tandu iya.

RESIA NYAGA PENGERAI

Lebuh ditanya bekaul resia pengerai tauka baka orang ti bisi ngembuan batu melaban tau ngasuh lubah tuai taja umur nyau deka masuk renggat pinchin tang dipeda agi sigat baka umur 30-an. Britin madah, nadai resia semina maya dani pagi mesti ngirup abis nadai segelas ai amat.

“Ati mesti seruran lantang belama tauka ‘Happy go lucky’ enti bisi penanggul mesti diputar enggau lengkas anang betangguh.

“Kebuah pia, makin lama diperam pengujung iya tau nyadi ‘penyakit’ ti ngujungka ka kitai kusut runding.

“Pekara pemadu beguna iya nya kitai mesti landik begulai enggau bala kaban tauka pangan, anang idup ngira diri empu aja sereta anang kurang bekunsi penemu berandau enggau orang ti pemadu semak sereta iya ke ulih dipechaya nuan empu nyema bisi penanggul dalam pengidup besehari-sehari,”ku iya.

Sebedau nutup randau, Britin bela baka kaban artis bukai ba industri muzik Iban mega iya nya ngarapka ulih sama besemekih besaup ngemajuka industri muzik Iban nyengkaum kerejasama ari bala pengeluar program ba stesyen radio Iban baka WaiFm, CatsFm enggau ke bukai.

Enda tinggal mega meri besai terima kasih nuju peminat ti semampai nyukung ari suba nyentuk ke diatu kelebih agi nuju peminat Band Rockschool ti enda leju ninga asil tengkebang ari kami sebuat ngelama tu lalu enda tinggal nuju semua band ba selampur menua mega.

Ungkup penerang mega Britin tu mega siku ari Komiti Besai Serakup Pemuzik Dayak bepengkalan ba Sibu ti chakah ngereja pengawa nulung orang tusah baka pekara pemati enggau penusah karam darat ke mega nuju orang ruang bilik ti kurang penatai pemisi.

Sebedau tu mega raban band sida udah mujur ngeluarka mayuh lagu single baka lagu Ambai Diambi Pulai, Kaban Ati Hari enggau ke bukai sereta iya ti pemadu baru iya nya Nuan Ukai Ungkup Aku.

Semua berengkah ari tiun muzik, leka lagu Nuan Ukai Ungkup Aku tu mega asil keranjai jari Britin magang, sereta nuju bala peminat ti bisi ati deka mending lagu-lagu raban Rockschool tau ngelawa channel youtube dikumbai Nang…


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak