Buah avocado ari Kpg Rajang nyamai

SARIKEI: Berita pasal buah avocado Kampung Rajang bisi ayan sebelah media rama apin lama ke udah.

Pun buah tu ditanam Halimah Tahir, diatu bebuah lebat nyentuk Menteri Muda Perambu Mengeri, Pengatur Tanah enggau Rampa Menua, Datuk Len Talif Salleh berumban ngabas kebun iya pengudah tepedaka berita tu ayan sebelah media rama.

Pia mega, buah avocado tu nerima perati ari Kepala Menteri (KM) Datuk Patinggi Abang Johari Tun Openg lebuh iya nemuai ke Sarikei.

Avokado tauka dikumbai persea americana nya sebansa buah ti suah ditanam ba menua Mexico enggau Amerika Tengah.

Nya kebuah, kitai berasai alit ati lebuh buah tu bebuah lebat enggau galak tumbuh ba Sarikei.

NYAMAI DIEMPA… Kepala Menteri Datuk Patinggi Abang Johari Tun Openg beratika buah avocado ari Kampung Rajang seraya mendingka penerang ari Len Talif (kiba) enggau Kaban Parlimen Tanjung Manis, Yusuf Abd Wahab (kanan).

Taja pia, buah ti manahka pengerai enggau suah diempa sida ti nyaga pemanah tubuh tu bebuah lebat di Kampung Rajang.

Nambahka nya, buah tu mega suah digaga nyadi jus enggau salad kelimpah ngundan vitamin ungkup pengerai batang tubuh.

Ku Halimah, igi buah avocado diberi kaban iya ti mai buah nya ari Indonesia.

“Iya meri aku tiga igi, udah nya buah nya diempa aku.

“Buah avocado tu nyamai diempa ngujungka igi iya ditanam aku semak rumah.

“Aku nanam buah tu baka ke nanam buah bukai tang enda nyangka buah tu galak enggau bebuah lebat.

“Aku mega enda nyangka buah tu besai manggai lebuh sekilogram sigi,” ku iya nerang ngagai pemberita.
Halimah madahka buah avocado tu ditanam ukai semina diempa aja tang mega dijual iya kelimpah nyadi pun penatai pemisi sida sebilik.

Sedarka pengulih buah nya, Halimah diatu nanam baru paung buah semak rumah iya.

“Aku nyual buah tu RM8.00 sekilogram lalu kandang aku nulak peminta pemeli laban bisi buah bedau mansau,” terang iya silik agi.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak