Kluster Kidurong udah punas

KUCHING: Komiti Penyaga Penusah Ngenyit Nengeri (JPBN) kemari madahka Kluster Kidurong Covid-19 udah punas.

Ku JPBN, Opis Menteri Pengerai Malaysia udah ngenukuka kluster nya udah abis sehari tu.

Kes kepenudi Kluster Kidurong dirikodka kena 6 Julai tu tadi ke alai 230 iku orang ti bekaul ti datai ari ruang bilik, orang ti sama gawa enggau ke bukai udah diperesa.

Ari penyampau nya lapan iku ari sida tauka 3.48 peratus ditemu positif Covid-19.

Kluster Kidurong ditukuka abis sehari tu pengudah 28 hari nadai ngerikodka sebarang kes baru.

Pia mega, JPBN madah nadai kes suman enggau pansut ari sepital dirikodka kemari ke alai kes suman enggau pansut ari sepital mengkang 554 iku.
Bisi 35 iku sida agi berubat ba wad isolesyen sepital lalu angka pemati mengkang 18 iku.

Bisi 19 iku pesakit agi dipatau (PUI) dirikodka sehari tu ke alai lima iku agi nganti peresa makmal.

Ba pekara Atur Tagang Pejalai Penyuman (PKPP), JPBN madahka bisi 1,849 buah premis udah dipatau nyengkaum pasar besai, restoran, kilang, bank, opis perintah, palan pedaja, palan besembiang enggau ke bukai.

Kelimpah ari nya, urung 1,767 buah kerita udah diperesa ba enam buah palan nyekat jalai alun di Lundu, Bau, Serian, Sri Aman enggau Lubok Antu beserimbai enggau Op Benteng.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak