Penemuai raban media ke Long Selaan

MIRI: Raban media nyengkaum pemberita media chelak enggau media rama (Youtuber) bisi ngambi bagi ba program nemuai ngagai Long Selaan diatur Sarawak Tourism Board (STB).

Long Selaan tu genturung pendiau raban bansa Kenyah ba Ulu Baram urung 10 jam pejalai ari Kuching kelimpah ngena jalai batang.

Lebuh datai ba Long Selaan, raban media chelak enggau rama bemalam ba Segah Selaan One Stop Homestay urung sejam pejalai ari Ai Wong Tekiwit ti tebilang ba Ulu Baram nya.

Raban media tu bisi ari New Sarawak Tribune (Miri), Borneo Post (Miri), Sin Chew Daily (Miri) enggau See Hua Daily News (Miri).

Sida udah datai ba homestay nya kena Hari Empat tu tadi diuluka staf STB.

SAUP ARI KAMI… Bala pemberita, Youtuber enggau staf STB nyuaka bantu pemakai ngagai Ketuai Komiti Kampung Long Selaan, Vincent Bilong Tingang

Ungkup penerang semua, Segah Selaan One Stop Homestay tu homestay diempu Rose Balai enggau laki iya, Joseph Lawai Apoi nya entara palan endur bemalam pemadu tebilang ba kandang menua nya.

Kelimpah ngatur bemacham aktiviti ungkup bala temuai, Rose enggau laki iya mega kemerah enggau bala temuai ti bemalam dia.

Homestay seduai nya berengkah beoperasyen ba taun 2014 nya ngembuan mayuh bilik ti nyaga pengelantang bala temuai ti milih bemalam dia.

Ba hari kedua, raban pemberita dibai bejalai enggau ngelantangka ati ngagai ai wong pemadu manah ba Long Selaan iya nya Ai Wong Tekiwit.

PEMATAK TEMUAI

LANDIK… Bala pemberita enggau Yotuber ngambi gambar dua iku indu Penan benung ngaga serut (kantung wi) ba Long Naman.

Ai Wong Tekiwit tu urung 45 minit bedarat ari genturung pendiau raban bansa Penan dikumbai Data Bila.
Nambahka nya, Ai Wong Tekiwit 100 meter peninggi nya entara ai wong pemadu tinggi ba kandang menua nya.

Bisi 20 rumah enggau urung 200 iku raban bansa Penan diau ngentapka diri ba Data Bila.
Ku Joseph Lawai Apoi, kelimpah ari Ai Wong Tekiwit, bisi mega palan pematak dikumbai Ai Wong Kelu’an ti suah ditapat bala temuai lebuh ngelawa Long Selaan.

Bala pemberita enggau Youtuber nampung pejalai ngabas genturung pendiau Penan ba Long Naman.
Ba genturung pendiau nya, sida mega indu Penan ngaga asil pengelandik jari.

Indu Penan chukup landik ngaga enggau nganyam asil pengelandik jari ngambi dijual sida dikena nambahka penatai pemisi.

Kelimpah nambahka penatai pemisi, asil pengelandik jari tu mega sebagi ari chara sida ngelakuka produk dikembuan raban bansa Penan.

Entara asil pengelandik jari tu iya nya bakul digaga ari wi, tikai, raga, ketapu enggau ke bukai.
Bala pejalai nya, sida mega udah nyuaka bantu pemakai ungkup sida ti tasah angus ba genturung pendiau raban bansa Kenyah di Long Selaan.

Kena 8 June tu tadi, 12 pintu rumah panjai udah angus lengis ngujungka 400 iku peranak ba rumah panjai nya semina tinggal gari ba punggung.

Taja pia, nadai penusah bebadi nyawa tauka bakal ketegal penusah nya enggau api enda nyerarai ngagai rumah panjai sepiak.

Ba hari keempat, bala pemberita enggau Youtuber mulaika diri pengudah tiga malam ba Long Selaan.

TINGGAL KENANG… Bisi 12 pintu rumah panjai Long Selaan ti angus lengis kena 8 June tu tadi.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak