Petronas nyua bantu ngagai 11 buah sekula

KUCHING: Petronas nengah Yayasan Petronas udah nyuaka hand sanitizer enggau dispenser manual ngagai 11 buah sekula ba Miri enggau Bintulu ungkup 16,634 iku nembiak, ditu kemari.

Nitihka penerang, pemeri tu sebagi ari chara nagang pengerekai Covid-19.

Perengka nya disua ngagai Opis Pelajar Pelilih ngambi disadung ngagai Sekula Sekondari (SMK) Lutong, SMK Tudan, SMK Senadin, SJK Chung Hua, Lutong enggau SJK Chung Hua, Pujut di Miri, sereta Sekula Primari (SK)Tg Batu, SK Kidurong, SK Kidurong II, SMK Kidurong, SMK Asyakirin enggau Kolej Vokasional di Bintulu.

Menijar Besai Petronas Sarawak Zulaihi Mantali madah, sida enggau naka ulih nyendiaka kereban ungkup komuniti ba sitak operasyen iya.

“Kami meransang bala nembiak, pengajar, staf enggau pengusung masu jari enggau chara ti pengudah sekula dibuka.

“Kami ngarapka pemeri nya ulih nyeliahka bala nembiak ari kena rampit igi penyakit tu seriris enggau tagit perintah deka ngurangka kes baru,” ku iya.

Pia mega, Yayasan Petronas mega udah nyuaka hand sanitizer enggau dispenser manual ngagai sekula primari enggau sekondari ba Johor, Kedah, Labuan, Melaka, Perak, Sabah, Sarawak enggau Terengganu ari Opis Pelajar Nengeri sida.

Inisiatif tu sebagi ari pemeri kereban perubat enggau bekal Yayasan Petronas berega RM20 juta dikena mantu sepital, raban gawa ba luan enggau raban ti mudah kena rampit ba menua tu ngambi nagang pengerekai Covid-19.

Pekara tu mega setipak enggau Agenda Penegap Petronas enggau Tuju Pemansang Meruan (SDG) tiga Gerempung Serakup Pupu Bansa ti fokus ngagai pengidup bepengerai enggau pengelantang semua


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak