KUCHING: Perintah Sarawak setuju nangkir tebing sungai ari Kampung Tanjung nyentuk Kampung Tupong dipejalai dibaruh Langgur Pemansang Malaysia Lumpar Ke-12 (RMK-12).

Kepala Menteri Datuk Patinggi Abang Johari Tun Openg madah, enti udah tembu jemah, semua tebing sungai ari Kampung Sungai Bedil ke Kampung Tupong deka manah dipeda baka Tebing Kuching.

“Nya nguna belanja RM30 juta ke dipelaba tembu tengan taun laban pengawa nya diatu udah tembu kira 30 peratus.

“Kitai bisi dua projek besai ke dipejalai ba Kampung Sungai Bedil, Kampung Lintang enggau Kampung Tanjung ngambika iya sebaka enggau pemansang ba seberai,” ku iya.

Iya ke mega Adun Satok nya madah munyi nya rambau aum pemberita maya ngabas pengawa ngaga tebing sungai nya ba Kampung Lintang ditu kemari.

Kenu ku Abang Johari, pengawa ngemanahka tebing sungai di Kampung No.3 nyentuk Kampung Patinggan deka disambung.

“Reti nya kededua tebing Sungai Sarawak deka dikemanah lalu diangkat nyadi produk dagang temuai.

“Tu beduduk ari kitai ngasaika awak bala temuai ulih beratika pemanah rampa sungai kitai,” ku iya.

Tandu iya, enti diperati tebing sungai enda semua besimen laban digaga ba tanah ke rebuh.

“Nya kebuah, kitai deka nanam enggau utai tumbuh nyangka pengawa tu ditampung enti projek keterubah udah tembu.

“Tu sebengkah ari atur kitai dikena ngangkatka infrastruktur di mengeri Kuching ari sukut dagang temuai,” ku iya.

Nangkan nya, iya mega madah ari tu ila deka muka mayuh peluang dagang ngagai peranak genturung pendiau ke besemak.

“Kelimpah ari tu, kitai mega benung ngemansangka Darul Hana seriris enggau Kampung Bintawa nyentuk Kampung Boyan.

“Diatu kitai benung ngaga pendiau ai wong ke dipelaba tembu enda lama agi ba Kubu Magherita lalu udah nya ngagai jalai Kompleks Dun awakka besambung enggau Jematan Darul Hana,” ku iya.

Pia mega, ku iya selampur mengeri Kuching deka dikemanah ungkup orang ke rindu bejalai kaki nyengkaum bala temuai.