Rumah Lanting, Nanga Gun di Tatau angus lengis malam tadi

TATAU: Lapan belas pintu rumah peranak Rumah Lanting Depong, Nanga Gun, Sungai Arip, ditu angus lengis, malam tadi.

Kepala Opis Bomba enggau Penyah Penusah Tatau, Jankey Jikat madahka, penusah nya nyadi urung pukul11.29 malam tadi.

“Rumah panjai 18 pintu tu udah angus 100 peratus lebuh raban bomba ke datai ba endur nya,” ku iya ba siti penerang ditu.

Rumah Lanting besemak enggau Sekula Primary (SK) Sungai Arip, Tatau.

Penyampau mensia ke nguan rumah panjai tu bisi 65 iku lelaki enggau 70 iku indu.

LENGIS…Pendiau rumah ke semina tinggal tiang bekau ari penusah nya.

Nitihka penerang, semua sida serumah mujur nyelamatka diri magang maya penusah angus nyadi lalu nadai penusah bakal tauka bebadi nyawa bekau ari penusah nya.

“Bala raban ari Opis Bomba enggau Penyah Penusah Selangau mega sama bisi ngesah nyaup ngerara api,” ku iya.

Penyampau pengerugi enggau pun penusah angus nyadi agi dipansik.

Ngelansa penusah ke nyadi tu siku peranak rumah panjai nya, Hilary Harisson dalam akaun media rama iya mantaika sebana chukup sinu beratika penusah ke nuntung rumah panjai sida pengudah ninga berita nya ari indai iya.

“Sinu ninga indai telefon tadi laban kami ke enda pulai siti barang pan nadai ulih diselamat. Enda dalam lima taun udah ngasai diau ba bilik (rumah) tu. Tang diatu abis lengis utai semina tinggal pengingat aja,” ku iya.

Berebak enggau nya, bala bakih tudah Hilary ke udah nemu pasal penusah tu bela ngenataika penyinu ati ngagai penusah ke nuntung sida serumah.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak