Semua piak patut ngadang enggau atur baru ba PRN12

BETONG: Semua piak kelebih agi ba renggat baruh patut ngadang enggau semua atur nyengkaum atur baru pengawa bepilih ti engka deka dipadah nyerumba Pengawa Bepilih Nengeri ke-12 (PRN-12) ketegal pangka igi penyakit Covid-19.

Sapit Kepala Menteri Datuk Amar Douglas Uggah Embas madahka, situesyen nya ila deka nyadi pemar besai laban atur pengawa standard (SOP) kelebih agi takah enggau pangan diri mesti dititihka belama.

Kenu ku iya, pengawa nya pemadu beguna dikena nyaga pengerai enggau pengelikun semua piak.

“Pandemik Covid-19 ti nyadi ba selampur dunya meri pangka ngagai pejalai pengawa bepilih ti deka digaga bebida banding enggau pengawa bepilih sebedau tu.

“Nya alai, kitai engka patut ngaga kus bekaul enggau pekara ti tau enggau enda tau digaga maya RRN-12 dikena nambah atur sebedau tu.

“Pia mega, kitai patut nyikap diri laban taja pengawa bepilih sekali tu pemadu beguna, tang kitai anang ngadaika pengelikun rayat,” ku iya.

Uggah ti mega Adun Bukit Saban madah munyi nya lebuh betemu enggau ketuai PBB ba Rh Francis Nyanggau dampih Penom, tadi.

Iya ngarapka semua raban parti patut nemu tiap penanggul ti ditapi rayat ba rengat akar umbi.

“Sida mega patut nemu sentang tikas pemansang sebarang projek pemasang ti benung dipejalai.

“Diatu tanggungpengawa kitai besai ngambika sida pengundi pechayaka Gempung Parti Sarawak (GPS) laban sida penyakal deka mansutka mayuh isu.

“Taja pia, GPS deka neruska agenda pemansang dikena nambahka penatai pemisi peranak menua pesisir entara iya nengah program transformasyen betanam betupi moden,” ku iya.

Berebak enggau nya, iya deka raban parti nemu sentang penyampau raban bala orang biak di menua pesisir ti lenyau pengawa ketegal Covid-19 ngambika tim Kepala Menteri Datuk Patinggi Abang Johari Tun Openg ulih nyusun perambu ti engkeman ungkup mantu sida nya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak