SK Ng Kesit, SK Skrang, SK Batang Ai enggau SMK Engkilili digaga baru bepun 2021

KUCHING: Juluk bala pengajar, staf enggau nembiak ba empat buah sekula repuk ba Parlimen Lubok Antu deka nyadi nyata lebuh projek nya dikemendar digaga baru.

Menteri Pelajar, Dr Mohd Radzi Md Jidin madah, empat buah sekula tu iya nya Sekula Primari (SK) Nanga Kesit, SK Skrang, SK Batang Ai enggau Sekula Sekondari (SMK) Engkilili.

“Empat buah sekula tu dikategori skeula repuk ti mesti digaga baru.

“Pengawa ngaga baru sekula tu disadang digaga pun taun 2021,” ku iya.

Mohd Radzi mansutka jaku nya lebuh nyaut tanya ari Kaban Parlimen Lubok Antu Jugah Muyang ba mosyen Aum Dewan Rakyat Renggat Julai 2020 ba indu mengeri, ditu tadi.

Ku Mohd Radzi, pengawa ngaga tiga buah sekula primari iya nya SK Nanga Kesit, SK Skrang enggau SK Batang Ai tu beungkus RM15.5 juta.

“Projek ngaga baru begunan SK Nanga Kesit tu mungkur enam bilik kelas, empat buah rumah pengajar enggau siti bilik Sains.

“Projek tu udah berengkah dipejalai kena 10 Julai tu tadi,” terang iya.

Terang iya, Perintah deka ngaga baru lapan unit kuarters ba SK Skrang.

“Ba SK Batang Ai, projek tu mungkur pengawa ngaga buding ungkup 100 nembiak enggau enam unit kuarters.

“Kededua projek tu ba renggat deka digaga enggau dokumen tinda disadang tembu bulan Ogos tu,” tandu iya.

Nambahka nya, Mohd Radzi madah, pengawa ngaga SMK Engkilili udah dikemendar dibaruh Projek Khas Opis Menteri Ekonomi (MEA) taun 2020.

“Skop projek mungkur pengawa ngaga enam bilik kelas, buding ungkup 200 nembiak, empat buah rumah pengajar enggau perengkaguna bukai nitihka standard.

“Naka diatu, projek nya ba renggat diperambu baka langkar enggau nyendiaka dokumen tinda,” ku iya.
Kelimpah ari nya ku iya, projek tu disadang dipejalai bepun taun 2021.

DIGAGA BARU…Buding nembiak indu ba SMK Engkilili.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak