TKPM diperambu dikemansang ba sitak Sungai Sibiew

BINTULU: Opis Menteri Betanam Betupi Moden, Tanah Adat enggau Pemansang Kandang Menua benung merambu ngemansangka Taman Mendam Pemansut Pemakai (TKPM) ba Palan Latih Betanam Betupi, Sungai Sebiew ba sitak kira 50 hektar pemesai.

Sapit Kepala Menteri Datuk Amar Douglas Uggah Embas madah ungkup renggat tumu, penyampau 12 hektar sitak deka dikemansang enggau mayuh bengkah asil utai tanam.

Kenu ku iya, TKPM nya deka dikemansang ngena chara baru ke lebih manah enggau meruan baka TKPM Rampangi enggau Sungai Baji di Sarikei.

Lebuh nerang ngagai pemberita pengudah licha Turu Perengkaguna Betanam Betupi begulai enggau pengari rayat mayuh di Palan Latih Betanam Betupi, Sungai Sebiew, iya madah Bintulu bepenau nyadi pengeluar pemakai beduduk ari peminta ke tinggi enggau makit ke besai ngagai komoditi bekaul.

TKPM endang sebengkah program perintah betuju numbuhka zon mendam ngemansutka pemakai.

Program tu mega dikena meransang bala pedagang produk betanam betupi enggau sektor peribit dalam ngemansutka pemakai, nyungka asil pemakai menua awakka chukup, bekualiti sereta seruran bisi.

Menteri Utiliti ke mega Adun Kemena Datuk Sri Dr Stephen Rundi Utom, Menteri Muda ba Opis Kepala Menteri (Undang-Undang enggau Adat Bumiputera) ke mega Adun Kakus, Datuk John Sikie Tayai, Adun Samalaju, Majang Renggi, Adun Murum, Kennedy Chuk Pai Ugon,

Direktor Opis Betanam Betupi Sarawak, Dr Alvin Chai Lian Kuet sereta pemangku Pemesai Betanam Betupi Bintulu, Anggang Jimbun bela bisi ngulu pengawa nya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak