KUCHING: Kepala Menteri Datuk Patinggi Abang Johari Tun Openg madahka iya lebih agi meri perati ngagai pekara pengerekai igi penyakit Covid-19 enti dibanding enggau pekara politik ti nyadi ba renggat Perintah Besai.

Kenu ku iya, iya enda entu deka pedulika pekara politik baka Muafakat Nasional (Umno enggau Pas) kelimpah meri perati ngagai Gempung Parti Sarawak (GPS) empu.

“Aku enggai ngelansa mayuh nangika bisi salah sebut. Pekara ti dirunding aku maya tu lebih ngagai Covid-19 ti majak ngirauka ati laban Kuching udah pulai ngagai zon mirah,” ku iya.

Iya bejaku munyi nya ba Pengerami Ngintu Taun Hari Mengeri Kuching Ke-32 di padang MBKS seharitu.

Kenu ku iya, kediatu GPS nyukung Perintah Besai iya nya Perikatan Nasional (PN + GPS).

Bekaul enggau politik menua Sabah ti berubah laban kaban kaunsil menua nya bisi merejuk parti, Abang Johari madahka iya enda ulih nyaut mayuh.

“Kami deka meda pekara nya laban bala kami nadai bisi merejuk parti,” ku iya.

Kena Hari Empat tu tadi Kepala Menteri Sabah Datuk Seri Mohd Shafie Apdal udah ngaga pemutus madamka Kunsil Nengeri (Dun).

Ku iya ti mega Presiden Parti Warisan Sabah madahka peminta madamka Dun nya udah dikemendarka Tuai Pemegai Menua (TYT) Sabah Tun Juhar Mahiruddin.

Datuk Patinggi Abang Johari Tun Openg