KUCHING: Hari bulan kepenudi nganjung peminta inisiatif bantu perengka pengangkut darat ungkup nembiak Sarawak ke deka rejister ba matrikulasi deka dilanjar.

Penyanding Penemu iya, Fazzrudin Abdul Rahman madah, pemutus nya berindik ari ubah rejister matrikulasi ungkup nembiak ari menua tu ke udah diubah ngagai 14 Ogos.

Ku iya, nitihka penerang urung 1000 iku nembiak ari Sarawak diterima masuk ngagai matrikulasi luar Sarawak.

“Naka kemari, bisi 200 nembiak udah rejister ba sistem kami laban hari bulan kepenudi nganjung peminta ditetap pukul 1 tengahari tadi,” ku iya lebuh dirandau Suara Sarawak.

Fazzrudin madah, hari bulan sebedau tu ditetap bepelasarka hari bulan rejister ti dibuka berengkah 1 nyentuk 3 Ogos.

Taja pia, hari bulan nya udah diubah ketegal sekeda pekara ti berundingka pengelantang enggau pengelikun bala nembiak.

“Kitai ngarapka bantu tu abis nadai ulih ngelempungka tating belanja apai indai ti enda ibuh nganjung anak sida ngagai endur belajar.

“Kitai mega ulih nyeliah sebarang penanggul baka kuarantin lebuh pulai ke Sarawak ila,” terang iya.

Dulu ari nya, Sarawak Volunteers enggau kerejasama Komiti Penyangga Penusah Ngenyit Nengeri (JPBN) nyendiaka inisiatif tu ngagai nembiak ti deka rejister ba matrikulasi KPM enggau KPT di di Semenanjung Malaysia enggau W.P. Labuan ti tebuka ngagai semua peranak Sarawak.