SARATOK: Pengelandik ngerara api lebuh dituntung penusah ke enda disadang baka penusah angus mesti dikembuan lebih agi peranak rumah panjai ke jauh ari Opis Pengerara Api enggau Penyah Penusah.

Sapit Menteri Pengeluar Kuasa enggau Pengeraja Asal, Ali Biju madah rayat rumah panjai anang sanggu ngulu licha dipejalai opis enggau ejensi perintah dikena nyikap diri ngena penemu ti patut.

“Tu beguna ngambika kita ampit nerima penerang beguna,” ku iya.

Ali mansutka jaku ba Program Randau Begulai Enggau Kaban Parlimen Saratok ba Rumah Panjai Abu Bengang ditu, apin lama ke udah.

Dulu ari nya sepenyampau 10 unit perengka pengerara api udah diberi ngagai Rumah Panjai Abu Bengang nyadika penabat sida serumah maya bisi penusah.

Ali ke mega Adun Krian madah surat peminta bantu perengka pengerara api tau dianjung terus ngagai Palan Servis Komuniti Sitak Parlimen Saratok maya jam opis gawa.

Ku iya, enti sema deka ngatur program licha nagang penusah angus enggau latih ngerara api tau dikenatai ngagai palan servis nya mega tauka ngelawa opis Bomba Saratok empu.

Iya madah, licha pasal pengelikun enggau latih mutarka penusah angus entara pekara pemadu beguna ti patut ditemu mensia mayuh kelebih agi sida ke diau ba rumah panjai di menua pesisir.

PENABAT MAYA TUSAH… Ali (tengah) ngemataka Nazry nyuaka perengka pengerara api ngagai Tuai Rumah Kambing. 

 

BAKA TU… Pemesai bomba nunjukka chara ngena perengka pengerara api enggau chara ke betul ngagai Tuai Rumah Kambing (bediri, kiba) enggau bala bukai.