KUCHING: Beserimbai enggau Hari Bujang Berani ke disambut kena 31 Julai ninting taun, gerempung veteran dibaruh Opis Pekara Veteran Soldadu Malaysia (JHEVATM) Pampang Sarawak bisi ngabas sekeda rumah raban veteran kena Hari Lima tu tadi.

Sida bisi nemuai ngagai rumah Veteran Nyelai Pendiau (VKU) sakit, balu, penerima midul bujang berani enggau ngabas pendam lama.

Pejalai di Sri Aman, diuluka Leftenan Jeneral (B) Datuk Stephen Mundaw begulai enggau kaban Gerempung Veteran Tentera Kor Renjer (PVTKR) bisi ngabas Datuk Awang Raweng, iya nya penerima midul bujang berani George Cross.

Udah nya, Gerempung Veteran ATM Tasik Biru betuaika Jidokson ngabas pendam RJR Lemon @ Oman ke midang maya beperang nyerumba Op Gopeng taun 1980 sereta ngabas pendam penerima midul bujang berani PGB Koperal Paul Nyopis.

Gerempung Veteran India Malaysia (PERIM) diuluka Presiden iya Kapten (B) Narayanan enggau Kolonel (B) Ratnam bela bisi ngabas sekeda rumah balu soldadu iya nya Fatima, balu ngagai Pegawai Waran 1(U) niang Govindasamy di Kampung Pridan enggau Munen, balu ngagai SPR niang Lexamanan di kampung Riih.

MERUAN DIKENANG…Pejalai gerempung veteran ba selampur menua tu dibaruh Opis Pekara Veteran Soldadu Malaysia (JHEVATM) Pampang Sarawak ke rumah veteran Raban Nyelai Pendiau (OKU)/ Veteran Nyelai Pendiau (VKU), sakit, balu, penerima midul bujang berani enggau pendam bala veteran.

Gerup Veteran Ex-10 Rejimen Renjer Diraja diuluka Leftenan Kolonel (B) Monday Juhit mega bisi ngabas rumah VKU Jack Nyarai di Kampung Remind, Serian.

Nangkan nya, PVATM Limbang diuluka Adeeputera bisi nemuai ngagai lima buah rumah balu veteran enggau dua buah rumah veteran ke enda bepengerai.

PVATM Kapit diuluka Pegawai Waren 2 (B) Martin Bilun bisi ngabas rumah veteran perang iya nya Rjr Ladong anak Sabut. Rjr Ladong ti kala nyereta pengawa raban pengelikun rambau penyarut menua Malaysia – Indonesia.

Kelimpah ari nya aktiviti nyerumba Hari Bujang Berani mega aktiviti tu nyadi kelai ngenang jasa bala veteran ATM enda ngira sekalika nya agi idup, sakit enggau udah midang.

Jasa sida ke udah midang meruan dikenang sampai ke jemah ila.