KUCHING : Parti PBB Pampang Gedong diatu udah sedia napi Pengawa Bepilih Besai Nengeri (PRN) lalu ngasuh komiti parti ba tiga zon nya numbuhka bilik operasyen pengawa bepilih ba endur diri.

Tiga zon PBB tu nya nya Zon Gedong mungkur genturung pendiau ba sitak Gedong baka Gumpey enggau Spaoh, Zon Pangkor ke mungkur Kampung Lubuk Punggor, Lubuk Buntin, Sungai Ba, Ensengei Melayu enggau genturung besemak sereta Zon Semalatong ke mungkur rumah panjai Iban di Ulu Simunjan.

Ketuai PBB Pampang ke mega Adun Gedong Datuk Mohd Naroden Majais madah, penumbuh bilik operasyen nya beguna dikena ketuai PBB ba renggat zon enggau pating ngaduka program bekaul dikena napi PRN.

Kenu ku iya entara program ke diperambu iya nya nyadung enggau nuatka tambai GPS awakka dipeda mensia mayuh.

“PBB sedia napi PRN ke deka diatur sebarang maya.
Pia mega bilik operasyen PRN ungkup Gedong bisi kedua udah dibuka,” ku iya maya dirandau Suara Sarawak ditu kemari.

Dulu ari nya Mohd Naroden bisi nguluka pengawa baum komiti PBB Pampang Gedong di Kuching.

Kenu ku Naroden perintah Sarawak ke diiring GPS deka terus mai pemansang ngagai sitak Gedong nyengkaum ngagai Ulu Simunjan enggau Pangkor.