KUCHING : “Cherita komunis enda ibuh agi dikenang laban ulah sida nya mih ti ngasuh menua kitai pedis (charut),” ku munyi timbal pandak Kolonel (B) Dunstan maya dirandau Suara Sarawak tadi.

Kolonel (B) Dunstan Nyaring anak Angking, 76 asal ari Seruai, Spaoh Betong lalu diatu diau mendam di Batu Kawah ditu siku ari soldadu ti kala beperang enggau raban komunis kelia.

Iya mega Bujang Berani Iban keterubah mujur bulih pangkat Kolonel dalam pengawa Soldadu Malaysia (ATM) urung taun 1980-an.

Nya alai beserimbai enggau Hari Bujang Berani kaban Gerempung Veteran Soldadu Kor Renjer (PVTKR) diuluka presiden iya Lt Kol (B) Mohd Melintang Abdullah datai ngabas Dunstan.

Hari Bujang Berani disambut kena 31 Julai ninting taun lalu awak tu dikena semua gerempung veteran di selampur menua tu ngabas bala veteran ti sakit, balu veteran sereta pendam bujang berani.

Sama bisi datai Penasihat PVTKR Leftenan Jeneral (B) Datuk Stephen Mundaw enggau bala bukai.