KUCHING: Lapan kes positif Covid-19 udah suman sereta dikemendar pansut ari Sepital Besai Sarawak (SGH) dirikod seharitu.

Sapit Kepala Menteri ti mega Chairman Komiti Penyaga Penusah Ngenyit Nengeri (JPBN) Datuk Amar Douglas Uggah Embas madah, tu ngujungka penyampau kes suman sereta dikemendar pansut ari sepital bisi 607 iku.

“Bisi 52 iku agi diperubat ba wad isolasyen sepital, lalu pemati ketegal Covid-19 mengkang 19 iku.

“Sehari tu (kemari) Sarawak nadai ngerikod kes positif baru Covid-19.

“Bisi empat kes baru pesakit agi dipatau (PUI) dirikod kemari, ke alai tiga kes agi nganti peresa makmal,” ku iya.

Uggah bejaku munyi nya ngagai pemberita nengah facebook Ukas ditu tadi.