KUCHING: Rayat Sarawak dipinta meri penerang ti betul lebuh ngisi penerang diri ba endur dilawa sida.

Pekara tu beguna amat ngambi ngemuntang pengawa nyidi kaul enggau lengkas enti sema bisi kes positif Covid-19 ditemu.

Sapit Kepala Menteri Sarawak Datuk Amar Douglas Uggah Embas madah, enti meri penerang ti salah, tu meri pemar lebuh nyidi kaul kelimpah pengawa mutuska rantai Covid-19 enda ulih dipejalai.

“Kitai bela nemu, Sarawak diatu bisi 10 kluster ti agi ngerekai.

“Nya kebuah, kitai enggaika penyampau kluster ti agi ngerekai tu majak nambah,” ku Uggah madah nyemetak.

Uggah ti mega Chairman Komiti Penyangga Penusah Ngenyit Nengeri (JPBN) Sarawak mansutka jaku nya ba aum pemberita JPBN, ditu kemari.