KUCHING: Gerempung Pengajar Bumiputera Sarawak (KGBS) nerima manah hari bulan muka sekula 2020 ti bepun 20 Januari baka dibantaika Menteri Kanan Pelajar, Dr Radzi Jidin ba Aum Parlimen apin lama ke udah.

Presiden KGBS, Ahmad Malie madah, pemutus nya bepelasarka pekara dipesetuju semua piak bekaul ba randau begulai ke udah diatur.

“Kitai nerima manah hari bulan muka sekula 2021 dilanjar pengudah berundingka kemisi ujung taun 2020 diinsur.

“Tu mega berindik ari kami ke nyadi sebagi ari gerempung udah dibai berandau ti ngempung penemu lalu setujuka hari bulan nya ba renggat Opis Menteri Pelajar Malaysia (KPM),” ku iya ba sebengkah penerang tadi.

Iya mega ngansak bala prinsipal enggau kepala pengajar (PGB) ulih meretika pekara nya kelebih agi ngaul pengelantang bala pengajar sekumbang kemisi ila.

“KGBS ngarapka piak PGB enda ngangauka bala pengajar pulai ke sekula kelalu tumu laban kitai udah minta kasih KPM ngingatka pekara tu ngagai sida.

“Kitai andalka piak PGB ulih meretika peminta tu lalu bebasaka pemutus ti meri pemaik ngagai kededua piak ba pengawa kitai nempa modal mensia ti menyana jemah,” tambah iya.