KUCHING: Siti kes positif baru Covid-19 nambah ba Sarawak seharitu lalu nya ngujungka penyampau semua kes positif naka tu bisi 679 kes.

Komiti Penyaga Penusah Ngenyit Nengeri (JPBN) dalam penerang media seharitu madahka kes tu dirikotka ba Pelilih Menua Kuching enggau dikategori nyadi kes import.

Kenu ku JPBN, kes ke-679 tu siku lelaki menua tu empu ti belajar ba menua Dar Al-Mustafa, Yaman.

Iya pulai ari Cairo, Mesir ngagai Kuala Lumpur kena 1 Ogos tu tadi.

Kes bisi singgah ba KLIA sebedau pulai ke Sarawak kena 2 Ogos ngena bilun lalu terus dianjung ngaga palan kuarantin di hotel sepengelama 14 hari.

Taja pia, kes nadai bisi nunjukka sebarang tanda penyakit Covid-19

JPBN madah, kes udah diperesa ngena RTK Antigen kena 2 Ogos di Kuala Lumpur tang pemutus madahka iya negatif.

Udah nya, kes lalu diambi peresa Swab ungkup peresa rT-PCR kena 3 Ogos lalu nganti pemutus nya ari Makmal Kesihatan Awam Kebangsaan (MKAK) Sungai Buloh kena 6 Ogos ti madahka iya positif Covid-19.

Tandu JPBN, kes udah dipasukka ba wad kena 6 Ogos lalu orang ti bekaul enggau iya mega agi dipansik.

Kelimpah ari nya, JPBN madahka agi bisi sepuluh kluster positif Covid-19 benung chakah maya tu nyengkaum kluster Serikat Kejuruteraaan lapan kes, kluster Mambong (7), kluster Pusat Perubatan (3) kluster Jupiter (3), kluster Pasar Stutong (7), kluster Jeti Kuching (2), kluster Sentosa (31), kluster PUI Melbourne (3), kluster Serikat Pembinaan Kuching (2) enggau kluster Pasar Satok (4).