KUCHING: Pengawa nirika Pos Kastam, Imigresyen enggau Kuarantin (CIQ) Tapak Megah ulih matau enggau ngurangka kampar tama nadai pemendar ngagai Sarawak.

Sapit Kepala Menteri Tan Sri James Jemut Masing madah, Tapak Megah semina 20 Kilometer (km) ari adan menua Kalimantan seraya 20 km agi sepiak iya nya Long Nawang ti diuan 5,000 iku peranak.

“CIQ Tapak Megah nya endang diguna ngambi ngelindung sitak nya enggau nadai mai barang baka petrol enggau gula chara belalai.

“Pengudah beoperasyen, CIQ Tapak Megah tu deka meri besai jasa enggau guna ngagai peranak Long Busang ngambi nagang penyalah nyadi,” ku Masing.

Masing mansutka jaku nya lebuh nerima penemuai basa ari Komander Briged Pasukan Gerakan Am (PGA) Sarawak SAC Mancha Ata ba opis iya, ditu kemari.

Sama datai ba penemuai basa iya nya Ajutan Briged PGA Sarawak DSP Yusuf Baki Khan, Pemesai Turus Gerakan/ Risik Briged Sarawak PGA DSP Sahamran Ibrahim enggau Pemesai Nyidi Briged PGA Sarawak ASP Norman Chendan.

Ba pejalai nya, Masing mega berandauka pengelikun adan menua Sarawak-Indonesia lalu fokus ngenegap enggau ngemanah tikas pengelikun ba sepanjai sitak semak enggau tiga tekat ai iya nya Tekat Ai Bakun, Murum enggau Baleh.

Ku Masing ti mega Menteri Infrastruktur enggau Pemansang Palan Penyangkai Kapal, kebuah pia laban tiga tekat ai nya rega pemadu berega ngagai sarawak.

Lebuh ngelansa pasal pemindah peranak ari Long Singut enggau Kem Pandora ba sepanjai Sungai Baleh, iya madahka pengawa nya mesti dipejalai diatu laban ubah rampa menua.

“Sebedau Tekat Ai Baleh beoperasyen, sida ti diau ba kandang menua ti baruh dia mesti dipindah.

“Pengawa ngemanah jalai batang ke diatu ari Long Singut ngagai Kem Mantan deka nyambung jalai ari palan pengentap Kenyah ba sitak Long Singut enggau Kem Pandora ngagai Long Busang,” terang Masing silik agi.

Bepun ari sitak nya, peranak deka nampung pejalai ngagai HEP Bakun enggau Belaga.

Kar adan menua Sarawak-Indonesia.