KUCHING: Rayat ba sitak Parlimen Lubok Antu deka ngasai jalai alun ke menyana agi pengudah peminta projek ngemansang jalai alun ba sitak nya dikemendar Perintah Besai, Hari Tiga tu tadi.

Pekara nya dikemendar pengudah Kaban Parlimen Lubok Antu, Jugah Muyang mantaika pekara nya ba Aum Parlimen enggau dipejurai ba Aum Parlimen Jul – Aug 2020, Hari Tiga tu tadi.

Terang Jugah, pengawa iya ngelama tu enda lebuh ngapa pengudah projek jalai ba sitak Lubok Antu udah dikemendar enggau deka dipejalai enda lama agi.

“Pemutus nya dibantai lebuh Menteri Pemansang Menua Pesisir, Datuk Dr Abdul Latiff Ahmad nyimpul mosyen kena 5 Ogos tu tadi.

“Tu ngaul projek nyeleti jalai batang Ulu Lemanak (renggat keempat) udah dikemendar ti beungkus RM12 juta enggau projek nya agi ba status dilangkar enggau deka ditinda bulan Disember taun tu,” ku iya nerang, ditu kemari.

Pia mega ku Jugah, projek nya mega ngaul jalai ngelawa genturung pendiau ba sepanjai Ulu Batang Ai, Lubok Antu enggau dikemendar ti beungkus RM187 juta, skop projek nyeleti jalai penyauh 25 kilometer diatu ba renggat deka dikerandau enggau deka ditinda bulan March 2021.

“Nambahka nya, bagi projek nyeleti jalai Ulu Skrang, Lubok Antu ngaul renggat kedua beungkus RM28.5 juta mega udah dikemendar.

“Status projek nya diatu ba renggat dilangkar enggau deka ditinda bulan Oktober taun tu.

“Entara perambu bukai iya nya Jalai Basi ngagai Kuching nengah Sibu ngena jalai batang Sri Aman enggau skop projek nyeleti penyauh 25 kilometer mega udah dipinta enggau dipejalai beungkus RM157 juta.

Taja pia, projek tu nitihka pemendar Unit Pengatur Ekonomi (EPU) Opis Menteri Besai enggau penuduk wang perintah diatu,” ku Jugah.

Berebak enggau nya, Jugah meri besai terima kasih ngagai Menteri Pemansang Menua Pesisir, Datuk Dr Hj Abdul Latiff Ahmad laban nambahka agih belanja ba sitak iya ti agi tinggal ari sukut pemansang.

“Kami mega beterima kasih ngagai Menteri enggau Perintah Besai laban udah ngemendar sekeda projek ba sitak Parlimen Lubok Antu.

“Dikearap semua projek tu ulih ngubah ekonomi peranak ngelingi sitak Lubok Antu,” tandu iya.