Menua Sarawak sigau dalam timpuh 30 taun, bepun 1960 nyentuk 1990 iya nya charut ketegal perang ngelaban komunis ti bebendar nyakal penumbuh Perintah Malaysia.

Taun 1963 kimpin Ganyang Malaysia dilancharka Presiden Soekarno tuai Parti Komunis Indonesia (PKI). Bekau ari nya kena 13 Disember 1995, SCO Chairman Bong Kee Chok siku orang kuat parti penyakal maya nya ari Sarawak United Peoples Party (SUPP) numbuhka raban gerila baru dikumbai Parti Rakyat Kalimantan Utara (PARAKU). Kee Chok dipadu nyadi tuai megai semua PARAKU di Sarawak.

Nyadi serak tu, Penghulu Ruai mulaika kenang ngagai siku tuai Iban ke chukup berani iya nya niang Penghulu Imban anak Medan ari Nanga Skuau, Ulu Oya ti udah lesi bebadi kena bunuh sereta diperinsa komunis enggau nadai ati kasih ketegal ditemu nyukung perintah kena 25 Febuari 1972.

Nitihka tusun cherita Lt Kolonel Linus Lunsong Janti, pagi sehari sebedau iya midang, Penghulu Imban bisi undur ke ili ngabas pukat ba Sungai Pinang. Dinga begeratuk utai tunga ke ulu. Nama mih nya, pia ku ati iya bejaku kediri. Nyeregu bulu pala asaika bisi sebayan mansa. Enda nya amai ati iya lalu mupuk pulai ke rumah.

Sepagi-pagi nya ati Penghulu Imban majak enda nyamai. Sindau-sindau sebelah ruai asaika bisi utai dikeirau lalu ati iya semampai kesal baka ke nemu bisi utai ke enda manah deka nyadi malam nya.

Urung pukul 8 malam, rumah panjai sida Penghulu Imban ditiki komunis ari puting setak, ari ulu enggau ili. Bisi mega tama ari dapur ngujungka bala sida serumah ke duduk di ruai balat tekenyit laban hari ke udah salah kelala.

Orang ti datai beterudus nya tadi keterudus nya tadi dikumbai sida Border Scout nyangka datai ngerandau deka ngaduka Pos ba Ng Skuau tang kebendar nya ukai.

Udah nya didinga nyawa siku indu ti chukup mangah ngasuh sida serumah pansut berintai ba siti ruai. Indu ti ngerah sida pansut nya benama CT Rabang lalu ngelicha mansutka jaku bejai perintah.

Berebak enggau nya, semua senapang sida serumah ke nyadi Border Scout digumpul komunis. Ulah komunis ti enda beradat tama ke bilik ngumpul keresa nya dirara TR Balang.

Raban ke bukai terus tama ke bilik ngiga Penghulu Imban. Penghulu Imban ditemu lalu ditangkap sereta ditarit sida. Iya nguji ngelaban raban komunis.

“Nama hal pengawa kita baka tu, nama penyalah aku? Enda aku irau diperinsa dipenyati kita enti aku salah ba penemu kita. Anang sesekali kita datai jari ba bala anak uchu kami serumah. Pupus kita ila enti kami betiki, bebalas,” ku jaku Penghulu Imban maya diperekuhka munsuh.

Peranak rumah panjai semina betepesap mata aja meda ulah komunis ngelaban Penghulu Imban tambah agi semua senapang udah dirampas bala komunis.

Maya ke dijamah bisi dua kali komunis ngachitka senapang tang enggai meletup, ketiga kali baru meletup. Tang nya bedau tepadamka seput Penghulu Imban laban ke endang bisi nangkin pelalung rajut pengaruh ke sempat dibatak sebedau ditangkap bala komunis.

Penghulu Imban terus dipalu sereta dipesaupka raban komunis. Kepenudi pemuas ke dipidatka sida, niang dientak enggau pugu senapang nyelinting pegu ti ngujungka nyawa iya padam pengudah tubuh iya telempai ba pala tangga peniki puting setak. Iya nadai urung 15 minit sebedau jam nuntung pukul 11 malam nya.

Indai tuai siku benama Besah, semina engkutung diau diri ba senentang bilik endur komunis nyamah Penghulu Imban. Bisi ati iya deka nyerauh tang takutka diri ditangkap sereta diperinsa munsuh. Naka pemedis niang Penghulu Imban diperinsa komunis enggau nadai ati perut mensia.

“Tu mih penyadi kita, enti kita ngeripot pengawa kami ngagai perintah,” ku jaku CT Rabang ngemba peranak rumah panjai nyentuk jaku jai iya pansut ngasuh bangkai tudah niang enda ibuh ditumbak ba tanah tang semina dianyut ngagai sungai.

Tang laban kitai Iban sigi orang beradat nemu pemali enda mudah nempayaka sereta enda mendingka jaku sida ‘Jelu Babas’. Komunis kelia dikumbai kitai Iban ‘Jelu Babas’ iya nya jaku karung dikena ngelar sida ti beterayap sebelah kampung tauka babas disemaka baka babi, rusa, tinduk sengapa nadai rumah endur diau.

Semalam-malam nya sida serumah diuluka TR Balang berumban ngaga sentubung, ngerakit papan sadau kengka utai dikemisi. Bangkai niang Penghulu diintu, digari sebedau ditepu dalam sentubung. Dia sida meda senentang rusuk niang bisi abi nemaram tang nadai abi telih tembus. Abi nya dipelaba leka peluru 303 Rifle.

Pagi siti, Edmund Gelau, Henry Empong, Clement Labang, Mat enggau Banta bekayuh ke ulu nganjung sentubung niang Penghulu Imban ke Pendam Pakuh.

Taja pia, ba taun 2010 ketegal penyiru dia bala uchu niang Penghulu Imban teulihka runding deka ngali baru pendam lalu ditumbakka sida baru ba Pendam Skuau asil penemu enggau pemendar ari Kaunsil Adat Istiadat Sarawak. Pengawa tu dikemujur kena 26 Febuari 2012 asil saup bala pemesai sereta perintah nengeri.

Pengawa tu dikereja nyerumba Operasyen Mai Pulai 21 iku rangkah bala Renjer enggau Iban Tracker ke bebadi nyawa ngelaban komunis di Perak, Kedah enggau Melaka. Semua sida tu ditumbakka baru ba Pendam Bujang Berani di Jalai Budaya, Kuching.

Kitai bela besampika semengat sida ke udah midang ketegal ngetanka menua meruan lantang begulai enggau Petara. Pia mega ngagai purih tiris pantis sida ke agi di menua arapka terus teulihka pemujur sereta diberekat.

Dikena ngingatka jasa niang Penghulu Imban dia perintah setuju meri nama sebuah sekula ba Skim Gempuru enggau nama SK Penghulu Imban. Pia mega bala soldadu ba Kem Batu 10, Jalai Oya bisi ngaga siti endur begempuru diberi nama ‘Teratak Imban’.

Ulah niang Penghulu Imban ke balat ngasuh sinu laban iya siku tuai ke nadai belampang ati talukka perintah sereta ngereja pengawa nadai bepinang benibung. Tanggungpengawa iya maya ke agi idup nyaga genturung pendiau ba menua Skuau, Batang Oya enggau Batang Pakuh.

Bala kitai Iban ti rindu macha silik agi pasal niang Penghulu Imban tau meli bup dikarang Lt Kol Linus diberi nama ‘The Murder Of Penghulu Imban’ dichelak 2018.

Penulis seninjik bendar bisi betemu enggau penulis bup tu kena 4 Ogos tu tadi rambau nyereta penemuai kaban Gerempung Veteran Soldadu Kor Renjer (PVTKR) ngabas Kolonel (B) Dunstan Nyaring anak Angking di Batu Kawah diuluka Presiden PVTKR Lt Kol Mohd Melintang Abdullah.

Sama nyereta penemuai tu Penyanding Penemu PVTKR Leftenan Jeneral (B) Datuk Stephen Mundaw, kaban PVTKR Pegawai Waran II (B) Klement Nyapong, Lt Kol (B) Anwar Bashakan sereta ke bukai.

BUP pasal pemarai Penghulu Imban.

 

PROGRAM PVTKR…Datuk Stephen Mundaw (tiga (kiba) nyuaka tepa sebuah jam ngagai Kol (B) Dunstan seraya dikemataka bala kaban PVTKR rambau pejalai ngabas veteran kena 4 Ogos tu tadi. Bela dipeda Lt Kol (B) Melintang (dua kiba), Lt Kol (B) Linus (bediri, tengah), PW II (B) Klemen (tiga kanan) enggau bala bukai.

 

BALA TUAI…Penghulu Imban (duduk dua kanan) begulai enggau bala tuai ke bukai. -Gambar pemeri LINUS JANTI