KUCHING: Rayat menua tu patut ngembuan ati ti lurus maya nitihka atur pengawa standard (SOP).

Kepala Menteri Datuk Patinggi Abang Johari Tun Openg madahka Perintah Sarawak udah nyendiaka RM60 juta dikena operasyen mutarka penyakit Covid-19 di menua tu.

“Kitai nemu igi penyakit Covid-19 udah ngerampit 19 juta iku orang ba selampur dunya lalu udah munuh urung 19,000 iku mensia.

“Nya kebuah kitai patut ngelaban penyakit tu ti mar dipeda enggau mata,” ku iya.

Iya bejaku munyi nya bejadika Pengerami Ngelancharka Program Kepolisan Komuniti ari Komiti Penyaga Penusah Ngenyit Nengeri (JPBN) ba Wisma Bapa Malaysia ditu, kemari.

Taja pia, ku Abang Johari ulah mensia empu nyadi pengelemi ngelaban penyakit nya ketegal ti enda lurus ati maya nitihka SOP.

“Bisi siku pemesai perintah enggau kami baum ditemu positif Covid-19 ti ngujungka aku empu kena kuarantin ba rumah.

“Endang ukai nyamai diau ba rumah 14 hari, tang enti ati kitai lurus nitihka SOP kitai patut nitihka aja atur tu.

“Anang sekali enchuri keluar, ngetas gelang enggau ke bukai laban ulah ti baka nya tau ngasuh orang bukai kena rampit,” ku iya.

Tandu iya, lebuh SOP tu udah dipejalai ba dalam komuniti, dia ketuai kampung ngempu tanggungpengawa nyaga menua tauka kampung sida.

“Ba kampung kitai ulih ngelala peranak kampung laban enda mayuh tubuh.

“Nyema orang nya enda dikelala, reti nya iya tama nadai pemendar, pekara tu mesti diperati nangika orang nya mai penyakit tama ngagai kampung kitai,” ku iya.

Iya mega meransang bala Adun ngambika nyaga sitak diri empu awakka nyaga pejalai rayat sida lebuh deka mindah.

“Pejalai rayat mesti dipatau enggau jalai chit mesti dijaga awakka nadai orang bukai ulih tama sepeneka ati kitu.

“Kitai mesti sabar enggau lurus ati napi penguji tu laban bedau bisi ubat ti engkeman dikena munaska Covid-19,” ku iya.

Sama bisi datai Sapit Kepala Menteri ti mega Chairman JPBN Datuk Amar Douglas Uggah Embas, Sekretari Perintah Nengeri Datuk Amar Jaul Samion, Menteri Kaunsil Kandang Menua enggau Pengawa Berumah Datuk Sri Prof Sim Kui Hian enggau bala bukai.