Linda Shimai Mit, 41 deka datai baru enggau album baru ungkup bala peminat di menua tu.

Siku penanyi ti kala tebilang enggau lagu ‘Dirantai Pengerindu’ madahka album baru nya ke bendar deka dikeluar Gawai tu tadi tang ditangguh dulu ketegal Atur Tagang Pejalai (PKP) dipejalai ba menua tu.

“Mayuh perambu enggau pejalai merindang ba selampur menua tejanggal ketegal penusah besai ti nyadi diatu.

“Lagu nya udah bisi lalu nitihka perambu deka dikeluar tang ditangguh ketegal PKP.

“Nya kebuah kami merambu lagu baru aku nya disadang dikeluar pun taun baru,” terang Linda.

“Arapka bala peminat besabar nganti album baru ari aku lalu aku mega ngarapka lagu tu deka diterima bala peminat.

Terang iya, album baru tu iya mayuh komposer nengkebang lagu dalam album tu, entara iya petunggal Linda empu iya nya Sulu Sarawak enggau Pengajar Sangin Juat.

ASAM GARAM MERINDANG

Peranak asal ari Memaloi Batu 8, Skrang Sri Aman tu siku penanyi ke udah lama beretan ba industri muzik Dayak.
Ku Linda, iya diatu udah 26 taun ba industri muzik di menua tu lalu mayuh udah ngeluarka album kompilasyen enggau lagu solo.

“Mayuh kenang manis enggau pait sekumbang nyadi penanyi ba menua tu kelebih agi nyadaka lagu ke tau narit ati bala peminat.

“Entara kenang manis ti kala diasaika aku iya nya lebuh nerima Anugerah Penanyi Tebilang Iban enggau Pemerindang Pemadu Manah ba program diatur RTM Miri dalam taun 2007.

AGI DITERIMA… Linda mengkang diterima bala peminat ba selampur menua taja penanyi baru majak nambah ba industri muzik Dayak.

“Mayuh agi kenang manis sekumbang nyadi penanyi kelebih agi begulai enggau bala peminat enggau merindang di menua tu.

“Ba penemu aku, kenang manis enggau pait tu ngajar kitai ngambi ransing agi merindang bala peminat.

JAPAI PEMUJUR

Pia mega ku Linda, iya mega kala nyereta Pekit Lagu ba program diatur RTM enggau CatsFM.
Sebedau tu, Linda mujur datai ba renggat final Anugerah Charta Sapa Juara (ACSJ) Ke-5 diatur WaiFM ba Dewan Stephen Kalong Ningkan, Betong.

Ba ACSJ Ke-5 nya, Linda mujur ba renggat final nyadaka lagu Di Rantai Pengerindu.

Anak keempat ari lima iku diri menyadi tu mega tebilang baru lebuh ngeluarka lagu Dirantai Pengerindu tu.

Ngelansa silik, Linda (nyadaka lagu Dirantai Pengerindu) entara finalis ACSJ Ke-5 enggau bala bukai baka Louis Bennet (Martina), Joyce Menti bepadu nyawa enggau Joseph Dresa (Pangan Entara Menua), Rickie Andrewson (Penyayau Enda Lela) enggau Kunatak Band (Ngejang Pegi).

Berebak enggau nya, semua finalis bela nerima trofi sida enggau mata duit penyampau RM1,200 ungkup kategori solo enggau RM5,000 ungkup kategori beraban.

Ngembuan patah nyawa ke chukup manah lalu mengkang diterima bala peminat di menua tu, Linda siku ari penanyi lama ke agi angkat sebaka enggau penanyi baru ke diatu.

Ngelansa pasal kenang pemadu berega, Linda madahka iya kala merindang ba Istana Sulutan Brunei enggau penanyi Iban keterubah dikangau merindang ba taun 2003.

“Lebuh nya, aku berasai tekenyit tang gaga laban enda nyangka diri dikangau belagu enggau Diva Indonesia, Kris Dayanti sereta Datuk M Daud Kilau beserimbai enggau Pengawa Ngintu Hari Pengada Selutan Brunei.

“Nya mih kenang berega sekumbang nyadi penanyi kelimpah ngemegah industri muzik kitai.

“Enda nyangka industri kitai Dayak dikerindu menua bukai lalu tu nunjukka industri muzik kitai seikas enggau industri muzik menua bukai.

LAGU-LAGU TEBILANG

“Diatu, aku agi dibaruh perabung LUH Production sereta penanyi keterubah ba serikat rekoding nya.

“Album keterubah aku iya nya Pengidup Bujang Dara dikeluar ba taun 1993 enggau album kepenudi dikeluar aku naka taun 2019 iya nya Sempama Tinchin Tusah Ati,” ku Linda nerang pasal album iya.

LAGU TEBILANG… Nama Linda majak tebilang pengudah ngeluarka lagu Dirantai Pengerindu ngujungka lagu nya mujur bepekit ACSJ Ke-5.

“Lagu keterubah ti ngangkatka nama aku ba industri muzik Dayak iya nya Asai Ati Enggai Beserara, Sinu Ngenang enggau Nadai Nyangka Nuan Berubah.

“Lagu tu mih ngasuh aku majak dikelala bala peminat ba selampur menua lebuh nya,” ku iya ngenang keterubah nyadi penanyi suba.

Nambahka nya ku Linda, mayuh pemar diasaika bala penanyi di menua tu kelebih agi taun tu.

“Besai amat penguji kami bala penanyi taun tu ketegal pandemik Covid-19 ngujungka semua aktiviti merindang dikinsil magang.

“Ngagai bala penanyi bukai, ngarapka semua kitai besabar enggau anang putus pengarap lalu ngiga chara bukai ngiga belanja.

Berebak enggau nya, Linda madahka diri enda bepenanggul lebuh semua aktiviti merindang dikinsil laban iya bisi dagang kediri empu.

Nya alai ku iya, sekumbang pandemik tu, iya fokus ba dagang iya ketegal enda ulih merindang.

“Naka ulih ngiga belanja pengudah enda ulih merindang bala peminat ketegal penusah besai tu.

“Kira diketu magang pejalai merindang taun tu,” ku Linda nerang pasal aktiviti merindang iya ti tejanggal ketegal pandemik.

PERANSANG DALAM INDUSTRI

“Apai enggau niang indai nyadika peransang aku beretan ba industri muzik tu laban seduai suah nguluka aku lebuh bisi pengawa merindang.

“Pia mega bala produksi, penengkebang lagu enggau bala bukai ba serikat rekuding LUH diatu.

“Bala peminat ti seruran nganti lagu baru enggau nyukung pejalai seni aku ngelama tu mega meri peransang ngagai aku ba dunya pemerindang tu,” terang iya.

“Ngena peluang tu, aku meri besai terima kasih ngagai bala peminat nadai ngira ba Sarawak, Brunei, Sabah enggau Semenanjung Malaysia.

Linda ngelalau semua kitai seruran nyaga pengerai diri, anang enda ngena sengkabung mua laban igi penyakit Covid-19 agi ngerekai ba menua tu.

“Sukung mih industri muzik kitai, Tuhan merekat semua kitai!,” ku Linda nyimpul randau.

KENANG KITAI… Linda begambar kenang enggau bala peminat.