KUCHING: Kepala Menteri Datuk Patinggi Abang Johari Tun Openg Gempung Parti Sarawak enda takut napi PRN ti deka datai laban pekara nya bepanggai ba prinsip demokrasyen.

“PRN bedau datai maya (agi lama),” ku saut iya sentang kemaya PRN deka diatur ba menua tu.

Berebak enggau nya, Abang Jo madah diri enggai kiruhka gerah ti dipadahka ex-Menteri Besai Tun Dr Mahathir Mohamad (Tun M) bekaul enggau isu deka numbuhka parti baru kena 7 Ogos tu tadi.

Dr Mahathir madahka parti baru nya deka nyukung pelasar Parti Pribumi Bersatu Malaysia (Bersatu) sebaka enggau pengawa asal maya numbuhka parti nya sebedau tu.

Iya mega madahka, parti baru nya ditumbuh atas semengat Melayu ti insklusif enggau jelan nyengkaum bepegai ba semaya, lurus ati sereta teguh.

“Mana katanya lah, malas I nak komen. (Barang ku iya meh, aku enggai bejaku mayuh),” ku iya lebuh ditanya pemberita pengudah Ngelawa Projek Ngaga Jematan Kampung Bintangor di Jalai Datuk Ajibah Abol ditu, kemari.

Dulu ari nya, kena bulan Mei ti udah lalu Dr Mahathir enggau empat iku kaban bukai udah ditingkilka ari nyadi kaban parti Bersatu Malaysia.

Empat iku agi sida ti bukai nya nyengkaum Datuk Seri Mukhriz Mahathir, Syed Saddiq Syed Abdul Rahman, Dr Maszlee Malik sereta Kaban Parlimen Kubang Pasu Datuk Ir Amiruddin Hamzah.

Sida lima ditingkilka nyadi kaban parti ketegal duduk ba bangku penyakal maya aum besai Dewan Rayat 18 Mei nyin kemari.

Kelimpah ari nya, nyaut tanya pasal Parti Islam Se-Malaysia (Pas) ti ngelanggar Rang Undang-undang laban udah ngeluarka jaku sida enda ngambi bagi bediri maya Pengawa Bepilih Besai Nengeri (PRN), Abang Johari madahka pekara nya tepulai ngagai sida empu.

“PRN agi lama, awakka sida bejaku munyi nya. Enda ngawa,” ku iya.

Tandu iya, semaya Pas Sarawak ti enda nganjung chalun bediri maya PRN ti deka datai dipadahka ketuai Pas empu sebedau tu.

“Baikka ketuai sida ngasuh tauka enda, aku enda nemu. Tang Gempung Parti Sarawak (GPS) udah besedia sebarang maya,” ku iya.