SIBURAN: Rayat Sarawak dikerap terus nyukung produk eko dagang temuai di menua tu ke udah balat labuh ketegal pangka pandemik Covid-19.

Menijar Taman Baya Jong, Teoh Yia Qing madah, mensia mayuh enda ibuh nangi ngelawa palan nya laban Atur Pengawa Standard (SOP) ba tikas tinggi baka ke udah digerah piak bekuasa.

“Nya alai, kitai nyendiaka rega ti manah ari selama ngagai bala temuai ti deka ngelawa palan tu pengudah iya dikemendar dibuka baru lepas timpuh Atur Tagang Pejalai Penyuman (PKPP) ila.

“Tikit tama ngagai Taman Baya Jong nya RM14 aja ungkup orang besai tuai ari menua luar lalu anak mit ke beumur baruh 12 taun nadai bebayar nyentuk ujung bulan September ila,” ku iya.

Iya madah munyi nya maya dirandau Suara Sarawak ditu kemari.

Kenu ku Yia Qing, sebedau tu rega ungkup temuai menua luar iya nya RM24 lalu anak mit ke beumur baruh 12 taun iya nya RM12.

“Kami mega mega natak penyampau temuai datai iya nya semina 100 iku aja dikemendar tama awakka sida ulih nyaga takah ari pangan diri.

“Taja pia, pengudah dikemendar dibuka baru, penyampau temuai ke ngelawa taman tu disadang kami kurang ari 100 iku sehari,” ku iya.

Tandu iya, penyampau temuai ke ngelawa taman baya ke pemadu besai ba Sarawak nya balat kusut ketegal pangka pandemik Covid-19 lebih agi pengudah PKP diterit.

“Enti suba, penyampau temuai ngelawa Taman Buaya Jong bisi 50 iku sehari lalu kekadang manggai 500 iku maya ujung minggu.

“Tang diatu kami kala nerima dua iku temuai aja sehari lalu kurang ari
100 iku maya ujung minggu,” ku iya.

Nya alai, Yia Qing minta rayat Sarawak terus nyukung industri ekopelancongan dalam menua laban ukai semina dikena mayar gaji pengereja pengawa tang mega dikena meli pemakai lebih 1,000 iku baya ba taman nya.

Ku iya, setan manuk dikena meri makai ngagai semua baya nya dalam timpuh sebulan lebih agi ungkup baya ke bebesai baka Bujang Sudin ari Gedong enggau Bujang Samariang.

“Tang kami meri besai terima kasih ke bantu ari perintah laban nengah Perkeso sida mayar gaji 20 pengereja pengawa RM1,200 sebulan dalam tempoh enam bulan.

“Tambah mega kami ulih ngurangka penyampau pengereja pengawa ari 20 iku ngagai 15 iku laban nitihka SOP,” ku iya.

Mensia mayuh ti deka ngelawa Taman Baya Jong ukai semina ulih ngemataka jelu mangah tang bepeluang meda 30 bansa jelu bukai baka jugam matahari, munsang, ular sawa, tupai, burung ruai enggau ke bukai.