KUCHING: Ketuai indu SUPP Kho Teck Wan madahka Perintah Sarawak sebuah perintah ti ngatur tanggungpengawa enggau manah sereta pandai ngatur belanja.

Kenu ku iya, Perintah Sarawak ba baruh pegai Kepala Menteri Datuk Patinggi Abang Johari Tun Openg udah ngena chara ti manah ngambika ulih mantu rayat ukai semina maya tu aja tang ba maya ti deka datai.

“Unit Pekara Pengarap Bukai (Unifor) Charitable Trust siti ari inisiatif pintar perintah dikena nyaga pengelantang rayat Sarawak ke ukai pengarap Islam.

“Unit nya deka bejalaika pengawa sebaka enggau Baitulmal ti nyaga pengelantang orang muslim di menua tu,” ku iya dalam siti penerang, ensana.

Kenu ku iya, penumbuh Kompleks Unifor ukai semina nyendiaka opis tang mega ulih ngenataika penatai pemisi ngagai Unifor Charitable Trust nyengkaum nyendiaka belanja nyaga pengelantang orang ukai Islam.

“Bisi 75 peratus peranak Sarawak ukai Islam lalu Kompleks Unifor tu nyadi tanda penyerakup enggau pengelantang pengarap di Sarawak,” ku iya.

Iya madahka, Parti Sarawak Bersatu (PSB) ba baruh iring Datuk Seri Wong Soon Koh patut nyukung Unifor ukai nyangkal penumbuh palan nya.

“Kitai nengeri keterubah di Malaysia ti bisi Unifor nyaga isu ti bekaul enggau pengarap bukai ngambika kitai ulih ngetanka pengelantang semua bansa enggau pengarap.

“Diatu Perintah Sarawak udah numbuhka sebuah unit dikena nyaga pengelantang orang ukai Islam.

“Semua rayat Sarawak enda ngira pengarap patut temegah dipegai Abang Johari,” ku iya.