SIMANGGANG: Bai ati balat angkun sereta rindu meda pengalus asil pengelandik jari meransang siku pedagang benama Riong Gimang nguji belajar ngelekat kerubung burie ba kain nunda orang bukai.

“Nguji ngapa mih tudah aku tu tadi laban rindu amat meda asil kain burie bala kaban.

“Tambah mega kerubung burie manding amat dipeda lebuh dilekat ba baju tauka kain nitihka bungai dero,” ku iya ngepunka randau enggau Suara Sarawak.

BELAJAR ARI BAKIH

Riong madahka diri nadai kala nerima latih tauka ngulu sebarang kursus tang semina betanya sebelah bala bakih iya di Bintulu nengah gerup Whatsapp aja.

“Aku enda kala belatih tauka ngulu kus pasal chara ngaga kain burie, iya nya kerubung buriek dilekat tauka dijait ba lambar kain beledu ti digagaka baju, kain tauka gaun.

“Nyau pemuas nadai pengawa ba rumah, pengawa tu nyadika bakih aku besehari sehari lalu nyadi dagang dikena nambahka belanja kami sebilik.

“Mujur enggau lantang asai ati laban ulih nyaup belanja nyengulaka bala anak,” ku iya ngelansa kenang diri.

Kelimpah ari ngaga burie, Riong mega landik nusuk manik nyadi kantung, lupung mit, marik, selampai, tangu asal enggau tangu moden.

Naka diatu, iya nerima mayuh udar ari bala penguna ukai semina ari menua tu aja tang mega ari sida ke diau ba menua Semenanjung baka Perak, Selangor, Johor enggau nengeri bukai.

REGAS

Terang Riong, kain burie ulih tembu dalam tiga hari seraya selampai burie jampat agi, nitihka pengelebat kerubung burie dilekat.

“Bisi nya tembu dalam sehari aja lalu bisi mega tembu dua hari, bepanggai ba jam aku ke megai pengawa nya enggau bungai dero ba kain.

“Kain burie tu tembu nitihka bansa bungai dero digaga sekalika penuh tauka enda.

“Ambika banding, enti dero utai tumbuh nya mayuh likau enggau besai, lama agi ga awak endur nembuka iya,” terang Riong pasal timpuh ngaga kain burie tu.

Iya mega madahka diri bisi ngaga pages dikena ngelakuka dagang burie enggau dagang bukai.

“Bala penguna ti deka meda tauka ngudar asil pengelandik jari aku tau ngelawa Facebook aku, Mmak Ata tauka pages aku, Mmak Ata Crafts.

Tebal agi, bala pedagang ngena pelasar digital dikena ngelakuka dagang sida laban chara tu muntang enggau mudah digiga mensia mayuh.

Bala pedagang mesti nemu bekenaka teknologi digital setipak enggau juluk Kepala Menteri Sarawak Abang Johari Tun Openg dekaka kitai nyingkang ngagai ekonomi digital.

LANDIK

“Sebedau tu, aku kala nyulam baju, selap mija, selampai, sirat, kain tating enggau sulam ti dilekat ba dinding.

“Nambahka nya, aku mega bisi beranyam bemacham bansa tikai,” ku Riong ti ngembuan mayuh pengelandik.

Diatu, Riong semina fokus ba dagang ngaga kain burie baka ba baju, selampai enggau ke bukai.

“Aku berengkah ngaga burie tu ba bulan Ogos taun 2018 nyentuk diatu.

Pia mega, iya madah ulih nembuka siti kain burie pengelama tiga hari.

Iya mega madahka diri suah nyereta pemandang enggau bejual ba Simposium Ngepan Iban ba Betong Taun 2019.

ENDA RANGKA PENEMU

Pengudah landik ngaga burie, Rimong enda kala rangka penemu ngajar bala bukai ngambi sama landik ngasilka bemacham kraf jari.

“Sebedau tu, aku kala datai ngajar bala penyereta ba bengkel ngaga burie diatur Opis Betanam Betupi Sri Aman.

Peranak asal Pakan nya madah iya kala dikangau Serakup Indu Dayak Sarawak (SIDS) nyadi akim pekit pengelandik jari ba taun 2015 suba.

“Berasai rindu ulih ngajar bala bukai ngambi kitai sama landik kelimpah pengelandik dikembuan kitai tu ulih nyadi dagang dikena nambahka belanja.

Berebak enggau nya ku iya, raban indu patut ngerembaika pengelandik dikembuan sida laban diatu mayuh inisiatif dipejalaika Perintah ungkup raban indu.

LIAT ATI

Indai ngagai tiga iku anak nya madah, pemar endang bisi ba dunya dagang diatu.

“Pemar endang bisi ngambi kitai naka ulih ngemansangka diri sebaka enggau orang bukai.

“Aku mega suah suntuk kerubung burie ngujungka aku ngiga ngagai Kuching enggau rega perengka ngaga burie ke majak niki,” terang iya silik agi.

Riong mega madahka iya enda kala dibantu lalu semua nya asil puku dagang iya empu.

Taja semampai nerima udar ari bala penguna, tang Riong madahka pos lagu ti lubah nganjung barang ngujung barang bala penguna laun datai.

“Nya alai, aku ngarapka dagang tu makin maju kelimpah ngetan pengelandik dikembuan bansa Iban.

 

PUH… Riong enggau naka ulih nangkup peminta bala penguna nitihka ukir dikedeka sida.

 

LANDIK… Tangu dilagu Riong ngena kerubung burie ngambi manah agi dipeda

 

KENANG KAMI… Riong begambar enggau bala penyereta Bengkel Ngaga Burie seraya mantaika kain burie ti udah tembu digaga.