KAPIT: Nasip petara agi nyangkung bala nembiak ti diau bemalam ba Sekula Primari (SK) Ulu Yong, urung 22 kilometer ari Pasar Kapit pengudah buding angus lengis, malam tadi.

Pengari ari Palan Operasyen Bomba Sarawak ba sebengkah penerang madah, semua nembiak ba sekula nya mujur lari nyelamatka diri.

Ku iya, sebuah rumah pengajar mega angus lengis ba penusah nya kelimpah ari buding nembiak lelaki.

“Balai Bomba enggau Penyah Penusah (BBP) Kapit nerima kangau ngenyit bekaul penusah urung pukul 11.39 malam.

“Seraban bomba ari BBP Kapit berumban ngesah ngagai endur penusah nyadi.

“Komander operasyen madahka blok kayu buding nembiak lelaki enggau rumah pengajar angus.

“Bisi sepuluh iku nembiak diau bemalam dia mujur lari nyelamatka diri.

“Api benung mau enggau jampat nyerarai ngagai rumah pengajar. Nasip endar dua buah rumah pengajar takah tiga meter ari buding nya ulih diselamat,” terang iya.