KOTA SAMARAHAN: Panjung minta tulung dua diri menyadi ngujungka siku lelaki ke benung rindang nyerungkai rumah sida di Muara Tuang Park ditu malam tadi tekenyit.

Pekara tu ditemu tudah ke empu rumah, beumur 12 enggau 14, lebuh tepedaka siku lelaki nadai dikelala dalam rumah, seduai terus manjung minta tulung ngujungka saspek terus ngelarika diri ari jenila biluk tinduk.

Ketuai Polis Pelilih Samarahan, DSP Sudirman Kram madah, saspek taja pia mujur ditangkap seraban polis pematau (MPV) Samarahan ti seninjik lengkas datai urung pukul 3.10 lemai.

Kenu ku iya, saspek lelaki, 23, nya ditemu ngena entukar Proton Iswara rambau raban MPV matau ba Lorong 5D, Taman Punan.

“Asil pansik tetemuka saspek nyerungkai rumah nengah chara ngeluit jenila sereta matahka kuil jenila bilik tinduk rumah nya.

“Saspek mega udah nabanka siti tabung duit ke bisi RM400,” ku iya nengah sebengkah penerang kemari.

Tandu iya, saspek udah nya direman pengelama 14 hari bepun 14 Ogos ngambi kes ulih dipansik.
Ku iya, kes nya dipansuk nitihka Seksyen 457 Kanun Keseksaan.