MAYA runding benung tusut, nadai buah penemu datai nyeruga endang chukup pedis ka ngasuh jari belanda naip dua tiga leka jaku.

Jauh agi ari ke nulis langkar karang ba lambar keretas burak. Endang chukup pedis ka ngasuh untak bepusin ngiga anak penemu ke patut nyadi karang bacha bala mayuh.

Graduet bidang Sains Sosial ari Universiti Malaysia Sabah (UMS), Nicholas J. Ugik madah, enti diau di mengeri, mayuh utai nekul enggau nanggul ngasuh enda ulih nulis laban pengawa ke chukup mayuh semampai enda ulih diseliah.

Maya pemisi pulai ke rumah panjai ati chukup lapang sereta runding pan tawas diumba menua agi chelap lindap, kensung burung chukup manah didinga sereta ribut muputka kayu ngasuh ati ngasaika penyamai utai ke ditempa Petara.

Ba perati Nicholas empu kandang berapa bulan ke udah, chukup mayuh pekara ke enda disadang nuntung ubah pendiau kitai Iban.

NAMBAH PENEMU… Sekeda ari kamus Jaku Iban – Jaku English & Jaku Iban – Jaku Melayu ke tau nyadika malin kitai.

Iban ke ku aku nya tadi enda ngira sida Iban di menua pesisir tauka di mengeri, baik ke iya diau di Kuching tauka Simanggang.

Baik ke seranta tauka Iban pemisi, tauka iya Iban bisi pelajar sekula tinggi tauka nadai enggau baik nya Iban rebak baru tauka Iban rebak lama.

“Nama kebuah karang tu bisi ditaip ngena leka licha runding mabu aku empu?

“Kebuah pia laban aku tu jara amat penemu, rapas endar pengelandik di ruang kandang dada, baka ke nyanda penemu bala mayuh meh tudah aku kena nyaut tanya ke digaga aku empu,” ku iya.

Kesatu ku Nicholas, jeman ke diatu mayuh amat kitai Iban besebutka pengirau ati pasal jaku Iban ke patut diangkun sereta peranak Iban endang patut ngetanka jaku Iban empu.

Enti ulih jaku Iban tu patut dibai nuju tikas ke tinggi agi ngambika sama bediri degi-degi enggau jaku bansa bukai.

ANGKUNKA PEMANSANG JAKU IBAN… Nicholas J. Ugik

Dipeda mata rapas iya empu, diatu jaku Iban empu udah nyadi siti jalai jaku ke diajar ba sekeda sekula di menua Sarawak ari sekula primari nyentukka Peresa Perintah Pom Lima.

Nambahka nya mega, jaku Iban tu siti ari penemu jalai jaku tauka linguistik ke nyadi kursus nyendiaka pengajar jaku Iban ba sekeda maktab di menua Sarawak enggau di Universiti Pendidikan Sultan Idris (UPSI).

Pia mega bisi serakup ke endang nyulut dalam pengawa ngerembai enggau mansik jaku Iban tu empu.

Apin lama ke udah ku Nicholas, bisi aum besai jaku Iban tu ti dipujurka sida ti endang ngempung pengawa tu.

Bisi mega seleka dua penemu mabu tu pansut empa pemuas rangap-rangap nadai pengawa.

Pulai baru ngagai randau kitai nya tadi, bakani ngasuh jaku Iban tu kering deh?

Naka ke dipelajar ba sebelah sekula, maktab tauka universiti endang enda chukup madahka jaku Iban tu kering.

Naka sekeda serakup ke balat kiruh ngemansangka jaku Iban tu endang sigi enda chukup.

“Ba penemu aku, jaku Iban tu ulih ngerembai sereta kering enti kitai Iban empu megai pengawa dagang besai.

“Tang bakani ulih mujur dalam pengawa dagang besai enti dagang mit pan kitai Iban nadai mayuh enggau besemekih?”

“Leka jaku ti pemadu muntang pansut ari mulut kitai bansa iya nya;
“Eh, enda ulih”.

Ketegal tiga leka jaku nya aja ulih nagang sereta ngemantulka niat kitai Iban besemekih dalam pengawa dagang.

Ba Malaysia pengawa dagang tu endang dikuasa sida raban bansa China.

Bansa China tu chukup liat ati, ubah pendiau ti chukup mereti dalam pengawa sereta chukup bagas enggau bebendar gawa ngulihka juluk ati sida empu.

Bah… nama bida Iban enggau China tauka bansa bukai?

Sama ga kitai ditempa Petara siku aja, sama ga makai asi, sama ga makai garam semina kitai ke enda chipit mata baka sida, isi kitai enda ngemurak sida.

Bida ti chukup besai ti tampak dipeda iya nya ubah pendiau dalam pengawa tauka jaku baru urang kemaya ari tu iya nya disiplin.

Nya alai minggu baru kitai deka bekenang silik agi baka ni dagang tu ulih ngangkatka jaku Iban.

Betampung minggu baru …