SIMANGGANG: Cherita pemerani Datuk Awang Raweng maya ngelaban komunis kelia deka dipasuk dalam bup Sejarah Malaysia Renjer.

Presiden Gerempung Veteran Soldadu Kor Renjer (PVTKR) Leftenan Kolonel (B) Mohd. Melintang madah kemari sida begulai enggau raban penulis bup tu bisi ngelawa rumah Awang Raweng di Nanga Skrang, Sri Aman.

Sama bisi nyereta pejalai tu dua pengelicha ari Unimas Dr.Regina Garai enggau Prof.Madya Dr.Neilson Ilan Mersat, kaban Sarjan (B) Empati anak Untol enggau PW 2 (B) Jeffery Milet.

“Pengawa nemuai ngundang bala Bujang Berani tu endang semampai dikereja PVTKR lebuh maya lepa tauka ujung minggu seraya nanya berita soda.

“Aktiviti baka tu siti chara dikena kami mandangka penyiru, pengibuh sereta dikena ngingatka ‘jasa’ sida ti udah bebendar berambun nyawa ngelaban munsuh maya menua agi sigau,”ku iya nengah sebengkah penerang kemari.

Ungkup rikod Awang Raweng siku ari Bujang Berani ke mujur nerima midul Bintang Bujang Berani iya nya George Cross pengudah menang betachah enggau munsuh ba sebengkah sebengkah operasyen ba Malaya kelia.

“Cherita pemerani Awang Raweng endang patut dipasukka dalam bup sejarah menua kitai awakka bisi dibacha sereta dikeingat enggau peransang rebak dudi.

“Nya alai, aku berasai temegah lebuh nerima berita ti madahka cherita pemerani enggau batang tubuh Datuk Awang Raweng deka ditulis sereta dipasuk dalam bup Sejarah Malaysia Renjer ti disadang tembu taun 2021.

“Terima kasih nuju semua piak ti kiruh bejalaika pansik dikena ngemujurka langgur tu, arapka cherita bujang berani bukai mega bisi dipasuk dalam bup tu,”ku iya.