BALAI RINGIN: Kompleks Lumba Balai Ringin dipelaba bepun digaga ujung taun tu nyema proses tender udah dipejalai.

Menteri Muda Nembiak enggau Lumba Datuk Snowdan Lawan madah langkar kompleks nya udah digaga lalu proses tender deka dipejalai enda lama agi.

“Engka ujung taun tu kompleks nya bepun digaga laban bepanggai ba proses tender.

“Pia mega, kompleks nya dipelaba tembu dalam kandang setaun tauka 12 bulan,” ku iya lebuh dirandau Suara Sarawak kemari.

Tandu Snowdan, kompleks lumba tu ila nyadi kelai endur sida nyeridi tauka ngulihka nembiak baru ti rinduka pekara lumba.

Perambu Kompleks Sukan Balai Ringin ti deka digaga ujung taun tu.

“Sitak aku, Dun Balai Ringin mayuh nembiak enggau atlit ti rinduka pengawa lumba, nya kebuah kitai bisi ati deka mansutka bala atlit ke ulih diangkat dalam pekara tu.

“Pia mega, mayuh ari sida datai ari menua pesisir nya ti ngasuh kompleks tu endang engkeman endur sida belatih jemah ila laban bisi disikap enggau perengkaguna ti baru sereta manah sebedau kitai ngambi sida ngagai renggat ke tinggi agi,” ku iya.

Iya madahka, pengelebih nyadi siku pengari dalam Opis Menteri Nembiak enggau Lumba meransang iya ngerandau Kepala Menteri Datuk Patinggi Abang Johari Tun Openg sentang perambu numbuhka kompleks nya.

“Aku suah meda sekula ba sitak Balai Ringin ngatur lumba entara sekula enggau zon..

Perambu Kompleks Sukan Balai Ringin ti deka digaga ujung taun tu.

“Lebuh kompleks tu udah tembu ila, dia piak sekula ulih ngatur pekit lumba ba kompleks nya.

“Ari nya sida ulih meda penau bala nembiak ti ulih maju ngagai tikas ke lebih tinggi baka renggat nasional,” ku iya.

Iya mega madahka, Stadium Serian ti suah diguna sebedau tu nyau majak tuai laban udah kelalu lama.

“Ari nya aku bulih idea ngaga sebuah kompleks lumba ti betikas entarabansa ti disikap enggau palan belanda, padang bol, padang futsal, gelanggang badminton enggau ke bukai.

Perambu Kompleks Sukan Balai Ringin ti deka digaga ujung taun tu.

“Ambika chunto di sitak Balai Ringin bisi 20 buah sekula, 19 buah sekula primari lalu sebuah sekula sekondari ke alai semua sekula tu ila ulih ngena kompleks ti sama lalu ngasaika perengkaguna betikas entarabansa.

“Pia mega, sitak Dun bukai baka Dun Bukit Begunan, Dun Betong, Dun Simunjan enggau ke bukai ulih ngena kompleks lumba nya,” ku iya.

Iya nandu, kompleks lumba tu siti ari anugerah Perintah Sarawak ngagai rayat dalam ngemansangka bala nembiak di menua tu.

“Aku ngarapka kompleks lumba tu ulih dikena semua lalu dijaga enggau manah,” ku iya.

Datuk Snowdan Lawan