SIBU: Dua lelaki lepas ukum mati pengudah Kort Tinggi ditu tetemuka seduai enda salah ba tuduh kes munuh, seharitu

Seduai nya, Udi Ambo, 31 taun, enggau Ngumbang Abang, 40 taun, dilepas ari tuduh nya.

Sebedau tu, seduai didawa di baruh Seksyen 302 Kanun Keseksaan enggau dibacha begulai Seksyen 34 Kanun ti sama ke alai seksyen nya ungkup ukum mati mandatori.

Seduai didawa munuh Jampong Jon, 55 taun kena 19 March 2017 entara pukul 12.30 pagi nyentuk 3.30 pagi di Ladang Chabi di Ulu Sungai Enseluai Sare, Sarikei.

Lebuh ngaga pemutus nya, Akim Datuk Lee Heng Cheong madah, bepelasarka penerang sumpah kededua ke dituduh , seduai semina ngetanka diri lebuh penusah nyadi.

Lee madah, seduai udah mantaika diri enggau bukti enda salah dataika seduai dilepas ari tuduh nya.

Iya mega ngaga pemutus nya pengudah berundingka penerang ari piak ngempu dawa, penerang sumpah kededua ke dituduh sereta beratika baru penerang saksi ari kededua piak; orang dituduh enggau ngempu dawa.

Udi diarika luyar Rosli Kapor ti dibantu Harold Emparak Kerebo seraya Ngumbang diarika luyar Jacob Wong.

Enam belas saksi dawa dikangau meri penerang pasal orang kena tuduh seraya Sapit Pendakwa Raya, Yong Suk Hui ngatur pechara kes nya.