ADAT Bebanchak Babi tu suah amai disebut ba mulut tuai-tuai kelia ke nyadi pengingat besai, ti dikenang nyentuk seharitu.

Insol Harry, peranak Batu Lintang, Undop di Sri Aman madah, bisi kebuah iya deka mai kita bekunsika jerita tu, nampung kenang sida ke udah layu sulai ba bup jerita tuai ti kala dibacha iya.

“Keterubah nya endang kena nerang reti leka jaku tu kebendar laban aku nemu mayuh rebak baru diatu nadai seling penemu pasal pengawa dikumbai Adat Bebanchak Babi, jauh agi disebutka nyata meda pengawa bansa tu dikereja.

“Lalu kedua kena kitai mulaika pengingat enggau dikena nyimpan jerita lama bansa tu dalam rikod media chelak enggau elektronik ungkup rebak dudi,” terang iya.

TUJU BEBAIK

NAMPUNG JERITA TUAI… Insol Harry

Insol madah, reti genteran jaku ‘Bebanchak Babi’ ti diterang ditu iya nya adat ti dikena bala ketuai menya besempekat, bebaik tauka adat badu bekayau, beserang pangan diri.

Nyadi dulu kelia ku iya, baka ti endang ditemu kitai, apin penatai Rajah Kulit Burak ari England, rambau nya kelia kitai raban bansa Dayak Iban endang ngemeranka pengawa ngayau nyadika siti ari gaya idup kitai.

“Nya alai, lebuh Rajah Kulit Putih iya nya Rajah James Brooke (1842 – 1863), Rajah Charles Brooke (1868-1917) enggau Rajah Charles Vyner Brooke (1917-1946) merintah menua Sarawak.

“Tebal agi pengawa bala Rajah nya nagang pengawa kitai Iban ti bekayauka pangan diri ari ti ngaga pemansang dipengunaka rayat.

“Nyadi adat Rajah ti nagang lalu deka ngemunaska adat bekayau ba raban bansa Iban balat bendar ngemediska ati sereta dikenggaika tuai-tuai Iban baka sida Tuai Kayau, Tuai Serang, Raja Berani, Bujang Berani enggau ti dikumbai Manuk Sabung, Manuk Pukung.

PENGINGAT LAMA… Temenggong Koh (kiba) begambar ungkup kenang enggau MacDonald (tengah).

“Nya alai dikena nagang enggau ngemunaska pengawa bekayau, dia Rajah suah ngatur adat Bebanchak Babi dikena bebaika tuai-tuai ti keran deka bebunuh ngelaban pangan diri,” terang iya lenak.

LAYA IBAN

Ari penerang dibacha ba Bup Gempung Jerita Tuai Bansa Iban dikarang Nalong Buda enggau Johnny Chuat nya ku Insol, nyadi keterubah adat Bebanchak Babi tu diatur Rajah, iya nya ba tengah Kubu Lubok Antu (Fort Arundell) kena 27 June 1888.

Iya madah, adat tu dikena bebaikka laya entara Iban Ulu Batang Ai enggau Iban ari Kapuas Ulu, ba menua Kalimantan, Indonesia ti enggai badu bekayauka pangan diri.

Nyadi kenu ku jerita ti ditusui orang ke tuai dalam bup jerita tuai nya, penyarut nya kelia betumbuh ari siku Iban ti benama Langgai ari Besayah, Kapuas Ulu ti mukut Belayung kitai Iban ari Ulu Batang Ai lebuh sida ti ngabang ke sepiak nyin.

“Nya alai ketegal laya nya, dia kitai Iban ari Ulu Batang Ai lalu nyerang rumah panjai sida Langgai di Besayah enggau sekeda rumah-rumah panjai din ti dipansa sida.

“Baka nya mega Iban ari sepiak nyin malas nyerang ke sepiak kitai kitu nadai milih bagi rumah ti enggau bemunsuh.

“Lebuh adat Bebanchak Babi nya dikereja menya, tuai-tuai ti nguluka bala Iban ari Ulu Batang Ai iya nya Pengarah Jimbun ari Jengin, Penghulu Ngali ari Delok enggau Penghulu Tembak ari Tinting Lalang.

“Lalu tuai-tuai ti nguluka bala Iban ari Kapuas Ulu iya nya Temenggong Budit ari Lanja, Pateh Menggong ari Malai enggau Temenggong Tutong ari Ampar.

“Sida tu ti datai rambau nya menya endang sama-sama bisi mai Tajau Ampun sigi ari sepiak-sepiak ti lalu dipetukarka sida enggau pangan diri,” tampung iya.

NGALUSKA MENUA

PENGERAJA… Rintai tawak enggau antu pala ba bilik bujang berani Iban

Nangkanka nya ku Insol, Adat Bebanchak Babi mega bisi diatur dua kali ba Simanggang iya nya kena 4 Ogos 1920 enggau kena 1 Februari 1924 dikena bebaikka Iban ari Batang Ai Engkari muak sepiak enggau Iban ari Lemanak, Skrang enggau Layar ari sepiak.

Adat Bebanchak Babi ti pemadu besai kala diatur Rajah Charles Vyner Brooke iya nya kena 16 November 1924 ti dikereja ba Kapit dikena bebaikka Kayan enggau bala Iban Ulu Batang Ai, Ulu Batang Rajang ti betuaika Penghulu Koh ari sepiak.

Lalu ari sepiak bala Kayan, Kenyah ari Batang Rajang begulai enggau bala Kayan, kenyah ari Apoh Kayan pegai perintah Belanda di Kalimantan Indonesia betuaika Tama Kila.

Insol madah, pengerami nya kelia digulu lebih 4000 bala tuai-tuai kayau begulai enggau bala manuk sabung enggau bujang berani ari kedua-dua piak ti sama chukup ngena ngepan, pekayan kayau, bebai terabai enggau sangkuh, betangkin pedang, ilang tauka nyabur.

“Pemesai ti ngulu pengerami nya kelimpah ari Rajah Charles Vyner Brooke, bisi mega datai siku Captain ari Netherlands Indies Army enggau siku Controleur Apoh Kayan di Kalimantan.

“Nyadi bala Kayan enggau Kenyah ti ari Apoh datai ngena 95 buah perau pengayau ti diuluka perau Tama Kila.

“Perau sida nya undur empat-empat buah begandin lalu sesiti baris nya bisi kira 50 ila ngentudika pangan diri.

“Lebuh sida mansa kapal Raja, dia meriam pan lalu diselup, bala sida nya mega lalu sama-sama sereta nirika sengayuh dikena nyelut Rajah Charles Vyner Brooke enggau pemesai-pemesai kulit burak ti ba dek kapal nya.

“Pengerami nya menya tebilang agi dikumbai ‘Palit mata, Sapu mua’, siti adat besai bebaikka menua,” ku iya madah nyemetak.

Ba pengerami Adat Bebanchak Babi nya kelia ku Insol, dia Tuan Rajah lalu meri Tajau Menaga Labang (Burak) sigi siku ngagai Penghulu Koh seduai Tama Kila enggau setawak selebuan siku ngagai sapit seduai.

Nya ke tanda sida nya udah nulung Rajah ngaluska menua sereta Penghulu Koh lalu dititah perintah nyadi Temenggong.

“Lebuh pengerami adat Bebanchak Babi tu dikereja, dia tuai-tuai kayau sereta enggau bala manuk sabung sida lalu bertabur berau kuning.

“Sida sama besumpah besemaya badu bekayau lalu betukar tajau tauka setawak dikena sida nanggam jaku semaya sida enggau pangan diri.

“Udah tembu atur ti besilihka tajau enggau setawak, nya baru atur ti manchak babi enggau sangkuh lunju pan dikereja tuai ari kedua-dua piak ba mua bala mayuh sereta enggau panjung-panjung,” tambah iya.

Udah tembu pengawa manchak babi, dia sida lalu berengkah rami makai, ngirup sereta lalu betabi, betundi berandau enggau pangan diri.

SIMPUL KENANG

Nya alai baka nya meh tuju enggau reti jaku ‘Bebanchak Babi’ enggau chara, gaya iya dikereja orang ke tuai dulu kelia ke malin penemu rebak baru.

“Laban adat tu lama udah dilengka, nya alai sida ke rebak dudi kemaya hari tu ukai semina enda nemu reti leka jaku tu aja.

“Sida mega sida nadai kala ninga adat tu disebut agi enti enda dirikod ngena teknologi pemadah (ICT) kitai baka tu,” ku Insol nyimpul randau enggau Suara Sarawak.