MIRI: Lima penyamun nabanka siku lelaki mujur ditangkap ba sebuah hotel di Jalai Cahaya urung pukul 1 dini hari tadi.

Sida ti beumur entara 18 ngagai 40 taun nya ditangkap seraban polis ari Opis Pansik Penyalah (JSJ) Indu Opis Polis Pelilih (IPD) Miri.

Ketuai Polis Pelilih Miri, ACP Lim Meng Seah lebuh dirandau madah, polis mujur tetemuka entukar MPV dipelaba dikena sida ngereja penyalah nya kelimpah ngerampas barang kes bukai.

“Lebuh nangkap sida lima nya, piak polis mujur ngatur kes tu kurang ari 12 jam pengudah penusah tu nyadi.

“Taja pia, kebuah sida nabanka lelaki nya agi dipansik,” terang Meng Seah.

Dulu ari nya, urung pukul 4 lemai Hari Dua tu tadi, siku lelaki dipelaba dipejal lalu ditaban ba mua sebuah kedai di Jalai Bintang Jaya 2 ngena sebuah entukar MPV.

Ulah bala penyamun nya mujur dirikod mensia mayuh semak nya lalu video pengelama 18 sikin nya udah dikunsi sebelah media rama.

Enda lama udah nya, urung pukul 7 malam, lelaki nya ditemu baru lalu dibai ngagai balai polis pengudah ditinggal ba mua bank di pasar nya.

Kes dipansik di baruh Seksyen 363 Kanun Keseksaan laban nabanka orang.