KUCHING: Peneras arus penyambung ba Palan Nyaga Jelu Siga Semenggoh tu deka mai bala pengusung nyadi duta dagang temuai Sarawak ba pelasar media rama sida.

Kepala Menteri Datuk Patinggi Abang Johari Tun Openg madah, bala temuai ulih ngambi gambar enggau video sereta dibantai ba media rama ngambi dipeda bakih sida sentang utai dikemisi Sarawak.

“Nya kebuah, Sarawak bisi tiga bansa mayas ti nyelai iya nya Borneoan, Sumatran enggau Tapanuli lebuh nyadi produk dagang temuai menua tu.

“Pia mega, Sarawak nyadi palan 2,500 jelu mayas diau ke ulih ditemu kitai ba Batang Ai, Sebuyan, Seduku enggau Lanjak Entimau di Julau,” terang iya.

Abang Johari mansutka jaku nya ba aum pemberita pengudah ngengkahka kelai taba Palan Kampung Hujan Semenggoh enggau ngelancharka arus penyambung ba Palan Nyaga Jelu Siga Semenggoh, ditu tadi.

Terang iya, pengawa nyendiaka arus penyambung deras ba Palan Nyaga Jelu Siga Semenggoh nya sebagi ari chara kitai nyikap diri nyadi tuai rumah ngatur Aum Besai Ubah Pengidup Mayas Sedunya ba taun 2023.