SARIKEI: Penusah karam di darat ti nuntung peranak Rumah Chat Chemalin di Nanga Bilat, Julau nerima perati kaban Serakup Dayak Sarawak (Pedas) Pampang Sibu.

Ngalihari tadi, sida sebuat ke betubuh 30 iku diuluka Sapit Ketuai Pampang (TKC) iya, Sangga Nabau, udah ngatur pejalai nganjung bantu pemakai seraya ngabas peranak ke tasah angus nya.

Ku Sangga, barang pemakai dibeli ngena duit pupu bala kaban serakup ke sama gerah jari betulung lalu digempuru dulu ba rumah siku ari kaban sida.

“Kami nyikap diri tumu nganjung bantu kin laban nemu endur deka dilawa nya jauh kelimpah ari jalai ke bebukit.

“Pengudah dipesetuju dalam aum, bala bebagi tubuh sapa bagi enggau nganjung bantu sereta entukar sapa ti dikena kin,” ku iya lebuh dirandau Suara Sarawak.

Sangga madah, sida ngena 10 buah entukar ngundan barang bantu baka berau, ai irup, mi enggau telu sereta utai diguna bukai nyengkaum enam guni gari.

“Kami mupuk urung pukul 1 lemai lalu datai ba endur dituju pukul 2 lalu, kira sejam pejalai ari kanowit.

“Lebuh datai dia, kami disambut bini tuai rumah sereta sida serumah enggau ai mata laban betatika diri sinu lenyau keresa enggau rumah endur diau,” ku tusi Sangga.

Iya ti ngarika sida sebuat nyuaka bantu ngagai bini tuai rumah ti disempulang mandal tuai rumah laban Tuai Rumah Chat udah limpang ke Pasar Julau ngaduka pengawa.

Berebak enggau nya, Ketuai Pampang (KC) Mathew Mudai meri besai terima kasih ngagai semua kaban Pedas selampur Sarawak laban udah bela gerah jari mantu enggau ngesah penusah nya.

“Aku temegah ati meda bala Pedas Pampang Sibu ke sangup ngulurka bantu sereta ngelimpangka awak diri nganjung bantu kin.

“Tu nandaka kitai agi bisi ngembuan penyinu ba bansa diri empu.

“Sekali agi meri besai terima kasih ngagai semua bala menyadi dalam Pedas kelebih agi menyadi ari Pedas Pampang Sibu.

Ungkup penerang, penusah ti nyadi lemai Hari Satu nyin tadi ngujungka 142 iku semina tinggal gari ba punggung aja.