KUCHING: Nyelai pendiau enggau ngena kerusi roda, enda nekul Lichu Loat mantu raban begunaka bantu begulai enggau Hope Place Kuching.

Lichu, siku orang gawa perintah nyadi sebagi ari raban volunteer palan nya kenyau ari lima taun ke udah.

Nitihka penerang Hope Place, taja pendiau Lichu baka nya tang iya naka ulih ngena penau dikembuan diri mantu orang bukai.

“Peranak asal Kampung Bedup Merian, Serian tu mantu ruang bilik seranta lalu deka nganjung bantu ngagai menua iya tiga bulan sekali.

“Pekara ti matak perati kami, Lichu ulih deriba entukar 4WD lebuh nganjung bantu ngagai sida semenua,” ku penerang nya.

TERIMA KASIH… Rodim (kiba) enggau Pemungkal Hope Place Kelvin Wan lebuh nganjung bantu pemakai ba rumah iya.

Entukar dikena Lichu kebendar udah diubah lalu semina begunaka jari iya aja.

Kelimpah ari Lichu, siku agi volunteer Hope Place benama Nagdalene Rodim Ringo, 61 taun, ti nyaup palan nya nyadung pemakai ngagai sida semenua.

Rodim asal ari Kampung Baru Mawang, 32 batu ari Kuching udah ngelawa Hope Place, semina deka ngambi bantu pemakai ungkup dua iku ke sama menua enggau iya.

Sekumbang pengerekai Covid-19, Rodim mega semampai betatika nasip raban seranta ke alai iya madah ngagai Hope Place pasal sekeda ruang bilik ti begunaka bantu.

Berindik ari nya, Hope Place meri tabi puji enggau terima kasih ngagai seduai ti chukup berani enggau ngembuan ati kasih mantu orang seranta.

“Seduai tu ukai semina meri pengidup baru ngagai orang bukai ti begunaka bantu tang mega patut nyadi chunto ngagai bala bukai,” ku Hope Place.