SARATOK: Sepenyampau RM20,000 agih belanja Projek Mit Pemansang Menua Pesisir (MRP) ungkup pemansang rayat Rumah Bujang, Empayang Baroh, Kabong ditu.

Sapit Menteri Pengeluar Kuasa enggau Pengeraja Asal, Ali Biju madah, agih belanja diberi nya endang dikena nyaup bala Komiti Pemansang enggau Pengelikun Genturung Pendiau (JKKK) ngatur pemansang sida serumah.

Ku iya, mayuh program enggau pengawa ulih diatur bala JKKK ungkup pemansang enggau pengelantang nembiak redak ba rumah panjai nya nyengkaum pemansang pelajar.

“Aku andal amat bala komiti ti udah dipadu gawa ulih bejalaika pangku pengawa diri empu, nyadi jematan entara rayat enggau perintah.

“Kitai bela nemu, nadai orang bukai ulih dikeandal bejakuka peminta rayat enti ukai ketuai sida empu,” ku iya ti mega Kaban Parlimen Saratok.

Nambahka nya ku iya, pengawa nyemin tengah laman rumah enggau paking entukar ulih diadu taun baru, enda ulih bajet taun tu lalu penyampau ungkus dikena apin ditemu.

“Kebuah pia laban kitai ulih ngena tinda, ulih mega minta belanja ari opis menteri tauka kaunsil pelilih, ngena belanja ke udah diagih perintah besai enggau perintah nengeri.

“Pekara tu ulih diperunding laban mayuh chara dikena ngemujurka perambu tu. Ila kitai beratika baru,” terang Ali.

Beserimbai enggau program nya, iya dipebasa nyuaka lapan unit perengka pengerara api ngagai sida Bujang serumah ke penabat sebarang penusah dudi hari.

“Tabi puji ke pemanah budi basa kita serumah, terima kasih besai ke pengiruh kita ngintu enggau mela pemakai kitai seharitu,” ku iya.