NADAI disadang, status Orang Nyelai Pendiau (OKU) ke dikembuan Amin Abdul Rahman lalu dikategori ‘kerdil’ ulih ngangkatka diri ba siti tikas ke ngemegah.

Peranak Kampung Telaga Air, Kuching nya dipilih ngarika Sarawak ungkup pekit Lumba Para Sukma 2020 ke deka diatur ba Johor Bahru taun baru.

Taja pia penau anak kelima ari tujuh diri menyadi nya tebantai maya nyadi pelakun drama ‘Lanun’ ba taun 2019.

Tang penau iya ba main badminton endang nadai disadang lalu nerima perati pematih tim iya nya Suhailai Laiman.

“Tu keterubah aku ngarika Sarawak ba main tu. Utai ke deka ditapi aku endang pekara ke besai.

FOKUS…Suhaili Laiman (kiba) maya beratika chara Amin bemain badminton.

“Tang, aku andal pekara ke deka ditempuh nya teulihka pemujur,” ku Amin maya dirandau Suara Sarawak.
Tandu Amin, ba lubuk ati iya dedin sigi deka nguji nempa nama ba bidang lumba enggau main taja beratika pengurang diri enda sebaka enggau orang ke menyana.

Taja pia, ku iya pekara nya ukai nyadika penekul ngagai iya mai pulai sebarang midul ungkup Sarawak jemah.

“Enti ba pengawa belakun aku ulih ngaga pengawa enggau manah, asaiku penatai aku ba pengawa lumba enggau main nadai tentu penanggul.

“Pekara ke beguna, aku patut fokus kelimpah bebendar nyapai pengawa ke diasuh,”ku tandu iya.

Berebak enggau nya iya ngarapka sampi ari semua rayat di nengeri tu awakka teulihka pemujur ba lumba dua taun sekali menua nya ila seikas enggau utai ke udah dijapai ba bidang melakun.

Amin madah, nyema ba mua kamera iya ulih ngemantup ati baka ke udah diasuh.

Pia mega iya ngarapka penatai iya ba bidang main badminton ulih nyapai pemujur ti ngemegah.

Amin maya pekit Para Sukma tu ila deka bepekit ba dua bagi kategori iya nya solo enggau beraban.

Kenu ku Amin, endang juluk besai iya deka bulih sebarang midul taja pengawa nya diasaika bisi pemar.

“Aku deka nguji ngaga iya enggau naka pemanah, enti diperati ba timpuh awak ke bisi, aku andal amat ulih bulih midul,” ku Amin.

Tandu Jurulatih, Suhaili Laiman ngaku, enda mayuh orang ke nyelai pendiau baka iya ulih nyapai penau ke baka Amin Abdul Rahman.

“Bepun ari bidang belakun, diatu iya fokus ngagai main badminton.

“Aku andal iya ulih nempa nama bepelasarka peneleba sebaka enggau japai ba pengawa belaku,” ku Suhaili.