SRI AMAN: Mensia mayuh dilalau seruran bejimat lebuh betemu enggau orang ti ngumbai diri Pemesai Betanam Betupi tang kebendar sida nya nadai surat pemendar.

Sapit Kepala Menteri Datuk Amar Douglas Uggah madah, sekeda ex-Pemesai Betanam Betupi ditemu nguji nipu lalu ngumbai diri agi bisi kuasa ngemendarka peminta subsidi tauka projek ari Opis Betanam Betupi.

Nya alai iya nangkan semua piak kelebih agi orang ke kala gawa ba opis nya pasal penanggul ditapi mensia mayuh.

“Kitai enda nemu nama tuju sida tang pechaya ulah baka tu deka ngasuh runding rayat nguingka sukung maya pengawa bepilih deka datai.

“Pejalai serak tu mega deka ngabas pemansang ba projek dipejalai di baruh Wang Turu Perengkaguna Betanam Betupi ditu.

“Nya kebuah ex-pemesai opis nadai hak nyadung pom lalu ngumbai diri deka mantu orang bumai.

“Enti sema ditemu ngereja pengawa baka tu, sida deka ngasaka ati rayat ti andalka diri bulih subsidi tauka bantu ari opis,” terang Uggah.