KUCHING: Siti kes positif baru Covid-19 dirikodka ba pelilih Menua Miri seharitu lalu ngujungka penyampau kes positif Covid-19 di Sarawak betambah nyadi 688 iti kes.

Komiti Penyangga Penusah Ngenyit Nengeri (JPBN) dalam penerang media kemari madahka, kes ke-688 tu siti kes import ari menua luar.

Kenu ku JPBN, kes nya ari siku lelaki menua tu ke gawa nyadi ‘scaffolder offshore’ beumur 55 taun baru pulai ari menua Amsterdam, Belanda.

Kena 14 Ogos iya nepan bilun ari Amsterdam enggau Doha, Qatar sebedau datai ba Kuala Lumpur kena 15 Ogos tu tadi.

Kes bisi bemalam semalam ba Kuala Lumpur sebedau pulai ke Miri kena 16 Ogos nengah Padang Bilun Miri.

Datai ba Miri, kes lalu terus bejalaika kuarantin 14 hari kelimpah nadai nunjukka sebarang tanda sakit.

Sebedau datai ba Kuala Lumpur, kes nusi iya bisi diperesa swab rT-PCR di Amsterdam tang pemutus peresa nya madahka iya negatif Covid-19.

Iya mega madahka, maya datai ba Kuala Lumpur iya bisi diperesa RTK Antigen kena 15 Ogos tang pemutus peresa nya sekali agi madahka iya negatif.

Lebuh bejalaika kuarantin ba hotel Miri, kes diambi peresa swab rT-PCR keterubah kena 18 Ogos ke alai pemutus peresa keluar kena 21 Ogos madahka iya positif Covid-19.

Kes udah dipasukka ngagai Sepital Miri ngambika diperubat. Pengawa ngiga orang ti besemak pendiau enggau iya benung dipejalai.