Tim Kuching FA dipelabaka deka pepedis nyatup Selangor 2 ba pekit main bol ke deka diatur ba Stadium Sarawak, Petra Jaya kena 28 Ogos tu.

Pekara tu beduduk ari enam iku pemain sida agi bedau regas sereta agi ngenatka pemedis.

Kelimpah ari penanggul kelalu lama ngetu sereta penanggul bukai ti enda ulih diseliah.

Tiga ari sida tu iya nya nyengkuam siku pemain import, Hudson Dias De Jesus, Mohd. Hairol Mokhtar enggau Rafiezan Razali ke agi pedis kaki pengudah ke belatih beberapa hari ke udah.

Kelimpah ari dua pemain ari menua Jipun, Yuta Suzuki enggau Yuki Tanigawa agi diasuh belelak sereta pemain benteng, Sahran Samad mega agi kena suspended.

NAMA PENYADI?…Hudson Dias De Jesus agi ngenatka diri pedis pun pah. – FOTO FAIZAL BUJANG

Pemantu Menijar, Iswandy Ali Hassan ngasaika penanggul nya nyau baka ngachau stategi sida.

“Pengawa berat nganti kitai ungkup pekit nya ila laban nadai pemain dikeandal.

“Kitai nadai pilih bukai tang nganjung aja pemain ke bisi,” ku Iswandy madah ngagai Suara Sarawak semalam.

Tandu Iswandy, semua perambu tumu sida napi pekit nya nyau tejanggal laban semua pemain enggau pemesai nyau kena kuarantin pengelama 14 hari ketegal lima pemain dituku kena rampit virus Covid-19.

Pemantu Jurulatih, Shahrizan Sahari mega enggai mayuh jaku beduduk ari penanggul ke nekul.

Iya semina meransang bala pemain terus belatih dikena napi main nya ila.

“Amat kami ila bisi penimpang ba sekeda posisi. Taja pia aku andal pemain ke bisi diatu ulih bemain enggau manah,” ku Shahrizan.

Iya madah diri deka nguna awak ke bisi endur nyikap bala pemain dikena napi main ti deka datai nya.