KUCHING: Siku agi Bujang Berani menua iya nya Lefternan Kolonel (B) Anwar Basha Khan Zakaria,72 taun deka dipasuk ba bup Sarawak Malaysia Renjer.

Presiden Gerempung Veteran Soldadu Kor Renjer (PVTKR),Leftenan Kolonel (B) Mohd.Melintang Abdullah madah sebedau tu sida udah merambu cherita pemerani Sarjan (B) Datuk Awang Raweng.

Nya alai, dalam bup nya mega ngundan siku agi cherita bujang berani ari menua tu iya nya Anwar awakka bisi nyadi peransang enggau malin rebak baru pasal pemerani sida rambau ngaluska menua ketegal dikeruga raban komunis kelia.

“Jam diatu PVTKR bekerejasama dua iku pengelicha Unimas Dr.Regina Garai Abdullah enggau Prof. Madya Dr.Neilson Ilan Mersat benung bejalaika pansik sereta nyidi bala veteran soldadu kelebih agi raban renjer ke bisi ba Sarawak awakka ulih dipasuk dalam bup tu.

“Bup Sarawak Malaysia Renjer dipelaba tembu taun baru (2021),”ku iya nengah sebengkah penerang, apin lama ke udah.

Melintang madah, Anwar diatu diau mendam ba Kuching lalu pemerani iya kelia nyau deka sebaka enggau Awang Raweng.

“Semina jam seduai diterima gawa nyadi soldadu bisi bebida, Anwar bepun diterima nyadi kaban 1 Renjer taun 1970.

“Iya (Anwar) mega kala betempur enggau komunis di Tanjung Batu Babi, Sungai Katibas (1971) ti ngujungka iya ‘koma’ empat hari ba sepital pengudah pala sepiak kiba balat bakal kena timbak munsuh.

“Pekara tu nyadi maya sida diserang ngenyit lebuh bejalaika operasyen begulai enggau 12 iku raban soldadu bukai ba Sungai Katibas,”ku iya baru.

“Cherita silik pasal Anwar ulih dibacha dalam bup Sarawak Malaysia Renjer ila,”ku tandu Melintang.

Ungkup penemu, Anwar asal ari Kuala Kangsar, Perak diatu diau mendam ba Kampung Gita begulai enggau bini iya ke mega asal ari Sarawak.