SARATOK: Agih belanja nengah Projek Mit Pemansang Menua Pesisir (MRP) nyadi sebagi ari chara dikena ngerumban pemansang rayat kelebih agi ba menua pesisir.

Sapit Menteri Pengeluar Kuasa enggau Pengeraja Asal, Ali Biju madah, udah hak genap iku rayat ngasaika buah pemansang ari projek dipejalai ungkup sida.

Ku iya, pekara ngaul pengelantang rayat tetap lumur satu enggau semampai diberi perati kelebih agi sida ke diau ba kandang menua pesisir ti agi ngasaika penyuntuk enggau pemerinsa.

“Aku sedarka kita ke diau jauh di menua pesisir enggau menua ulu sungai agi napi mayuh pemar ketegal bedau disikap ngena perengkaguna pemun nitihka pematut.

“Bisi sekeda rumah panjai apin datai jalai, bisi nya empai disambung kuasa karan enggau bekal ai beresi lalu agi tubah menua apin kena bungkur arus penyambung.

MAI PEMANSANG… Ali dipebasa bejaku ba mua mayuh rambau program penemuai gawa ngagai Rumah Noel, Praja Ili, kilah ensanus.

“Penanggul baka tu deka diputar lengkas lalu kitai begunaka agih belanja ari perintah, nya kebuah aku ngiga jalai mai pemansang tu ngagai kita,” ku iya ti mega Kaban Parlimen Saratok.

Ali mansutka jaku nya rambau Program Penemuai Gawa Sapit Menteri Pengeluar Kuasa enggau Pengeraja Asal Ngagai Rumah Noel di Praja Ili, ditu lemai ensanus.

Iya madahka diri naka ulih bejalaika pangku pengawa ti udah dilempai ba tandan bau iya.

“Nya alai sehari tu (kilah ensanus) aku ngemendarka agih belanja MRP penyampau RM20,000 ngagai Komiti Pemansang enggau Pengelikun Genturung Pendiau (JKKK) kita seraya RM5,000 ungkup Biro Indu.

“Nambahka nya, JKKK Rumah Nyelang, Sungai Buluh enggau JKKK Rumah Cecilia, Praja Ulu bela deka nerima MRP penyampau RM10,000.

“Ari nya aku ngarapka bala kita ulih ngena manah agih belanja ke udah diberi, kena ngaduka pengawa pemansang ke patut pulaika pemaik kita serumah,” lalau iya.