KUCHING: Jaku tuduh ‘Bumiputera deka enchuri enti enda dibantu perintah’ ke ayan ba media rama ti dituduh dipansutka Kaban Parlimen Batang Sadong Datuk Sri Nancy Shukri, siti jaku tuduh ti enda pintar.

Nancy ti mega Menteri Dagang Temuai, Seni enggau Main Asal madahka jaku tuduh nya ditandu belama kenyau ari taun 2013 suba.

“Aku meda ninting taun kelebih agi lebuh enti maya pengawa bepilih majak semak jaku tuduh ti baka nya deka ayan baru dikena piak ti enda pintar bejai aku.

“Nyadi siku kaban parlimen sereta siku Bumiputera, aku berani besumpah, nadai kala bejaku munyi nya,” ku iya.

Nancy madah munyi nya ngagai pemberita maya dirandau ba Pengerami Makai Lemai ke diatur ba sebuah restoran di Jalai Rock ditu malam tadi.

Ku iya, tuduh ti baka nya ayan endang enggau tuju ngambika bansa Bumiputera enggai meda iya.

“Kitai ba Sarawak enda dichap menua ti pemadu beserakup di Malaysia, nama tuju aku deka ngeruga penyerakup tu mambarka bansa Bumiputera.

“Enti orang ti ngerembaika tuduh nya sengaja deka nanam pemenchi rayat ngagai aku, sida salah.

“Pengundi ba sitak aku urung 80 peratus Bumiputera, nadai bulih penguntung sida ngajum ngerusak penyerakup di menua tu,” ku iya.