KUCHING: Ulah Parti Tindakan Demokratik (DAP) ngengkahka tulis Mandarin nadai pemendar tau ngasuh mensia mayuh saru penemu ba nengeri tu.

Chairman Parti Sa’ati Rayat Sarawak (SUPP) Pampang Stakan Sim Kiang Chiok, madah ulah tu siti chunto ti enda manah sereta ngelanggar undang-undang di Sarawak.

“Piak DAP Sarawak patut nulis surat, minta Dewan Bandaraya Kuching Utara (DBKU) nukar ngagai nama-nama Mandarin ke lenyau nya, dibanding terus ngereja pengawa nya enggau enda bepadah.

“Tu mandangka, DAP Sarawak ngembuan niat negatif dikena mechahka penyerakup ke diatu, semina dikena ngulihka undi,” ku iya madah nengah sebengkah penerang media, ensana.

Ku iya, pengawa tu bebida enggau Gempung Parti Sarawak (GPS) ke seruran bulih sukung nengah polisi nyerakupka semua pupu bansa di Sarawak.

“GPS nadai ngemeluka sesapa lalu nyaga penyerakup pupu bansa di Sarawak,” ku iya.

Berebak enggau nya, iya madah DAP ngelama tu nadai mandangka pengulih maya megai Perintah Besai ungkup timpuh 22 bulan ke udah, “ ku iya.

“Tu mandangka DAP ukai ungkup Sarawak laban apin lama ke udah Adun Padungan, Wong Kim Wee ke udah ninggalka parti nya,” ku iya.

Berebak enggau nya, DAP Sarawak mesti bejimat ngereja pengawa ke ulih ngenusahka ati rayat sereta ngeruga pengelantang di nengeri tu.